Ստուպինոյում գազի պայթյունի հետևանքով զոհերի թիվը հասել է վեցի
Ճշտված տվյալների համաձայն՝ մերձմոսկովյան Ստուպինո քաղաքի բնակելի շենքերից մեկում գազի պայթյունի հետևանքով մահացել է վեց մարդ, այդ թվում՝ երեք երեխա: Այս մասին «ՌԻԱ Նովոստի»-ին հայտնել է Արտակարգ իրավիճակների նախարարության տարածաշրջանային գլխավոր գրասենյակի մամուլի ծառայությունը:
Ավելի վաղ նախարարությունից «ՌԻԱ Նովոստի»-ին տեղեկացրել էին, որ վթարի պատճառը եղել է գազի արտահոսքը՝ անսարք սարքավորումների պատճառով։ Սկզբում հայտնի էր դարձել մեկ զոհի մասին։
Պայթյունը տեղի է ունեցել ժամը 05:54-ին կենտրոնական նրբանցքի 4-րդ հարկի բնակարաններից մեկում: Երկու բնակարանում քանդվել են ներքին միջնապատերը, իսկ չորրորդ և հինգերորդ հարկերում փլուզվել են արտաքին պանելներ։ Երրորդում՝ պատերը թեքված են, ապակիները՝ փշրված:
