«Էդ մեդիատեռորի մե՞ջ եք մեղադրում ՄԻՊ-ին, տիկին Կարապետյան. լո՞ւրջ եք ասում». Արման Թաթոյան
Այսօր Մարդու իրավունքների պաշտպան Արման Թաթոյանի՝ Ազգային ժողովում 2020 թվականի տարեկան հաղորդման և զեկույցի քննարկումից հետո, «Իմ քայլը» խմբակցության անունից ելույթով հանդես եկավ Մարիա Կարապետյանը։ Նա կարևորեց ՄԻՊ գրասենյակի աշխատանքը, բայց չմոռացավ որոշակի անհամաձայնություններ հայտնել: Պատգամավորը նշեց, թե ՄԻՊ անկաշկանդ աշխատանքը «Հայաստանի ժողովրդավարության ցուցիչ է, թավշյա հեղափոխության արդյունք և նաև այս կառավարող ուժի ձեռքբերում»: Նաև ավելացրեց, թե չի կիսում ՄԻՊ գնահատականները կորոնավիրուսային համավարակի սահմանափակումների վերաբերյալ, ու նշեց, թե ՄԻՊ որոշ հայտարարություններում և վերլուծություններում կա քաղաքական երանգավորում, և չեն նպաստում մարդու իրավունքների պաշտպանության համակարգին:
«Բոլորս էլ հիշում ենք, թե ինչպես նոյեմբերի 9-ից հետո, հատկապես դեկտեմբեր ամսին, հանրությունը ենթարկվում էր մեդիատեռորի՝ սուտ, կեղծ լուրերի միջոցով, որոնց նպատակն էր տագնապ հարուցել և խախտել առանց այն էլ փխրուն հանրային հոգեկան անձեռնմխելիությունը: Սկսած դեկտեմբերի 17-ից, պարոն Թաթոյան, Դուք պարբերաբար ահազանգել եք սահմանագծման և սահմանազատման մասին, կարծես նման գործընթաց իսկապես տեղի էր ունենում»,- ասաց իմքայլական պատգամավորը:
Ա․ Թաթոյանն իր եզրափակիչ ելույթում Մարիա Կարապետյանին նախ հիշեցրեց, որ ՄԻՊ-ն A կարգավիճակ է ստացել 2016, 2017, 2018 թվականների գործունեությունը գնահատելու համար, նշելով, որ պատգամավորի հայտարարությունները բացահայտ մանիպուլյատիվ և վիրավորական հայտարարություններ են:
«Տիկին Կարապետյան, Ձեր ասածը բացահայտ կեղծիք է, փաստերի կեղծում է ու շատ վիրավորական է ՄԻՊ սահմանադրական ինստիտուտի նկատմամբ՝ որպես կառավարող խմբակցության կողմից ելույթ ունեցող անձի կողմից այդպիսի ուղերձներ հղելը:
Ես ասացի, որ A կարգավիճակը մենք ստացել ենք և անկաշկանդ գործում ենք միջազգային հավաստում, հատուկ ելույթումս նշեցի, ես սպասում էի, որ նման ելույթ կամ նման արձագանք կլինի, նույնիսկ ուզում էի ելույթում 2-3 անգամ շեշտեի, որ դա մենք ստացել ենք 2016, 2017, 2018 թվականների գործունեությունը գնահատելու համար: Հետևաբար՝ ՄԻՊ-ը միշտ է եղել անկաշկանդ, տիկին Կարապետյան: Եթե ՄԻՊ-ը անկաշկանդ չլիներ, 2018թ․ ապրիլ-մայիսի իրադարձությունների ժամանակ միջազգային բարձրադիր բոլոր ամբիոններից գնահատականների չէր արժանանա, այդ թվում՝ ԵՄ-ի կողմից, որ օրինակելի կառույց է ՄԻՊ հաստատությունը այն առումով, թե ինչպես այլ երկրներում կարող է աշխատել հավաքների ազատության հարցում և երկրում համերաշխություն հաստատելու հարցում:
Էդ մեդիատեռորի մե՞ջ եք մեղադրում ՄԻՊ-ին, տիկին Կարապետյան. լո՞ւրջ եք ասում: Բա ինչպե՞ս հասկանանք այն, որ մարդիկ պատերազմից հետո գտնվում էին տեղեկատվական բլոկադայի մեջ, պետությունը որդեգրել էր չափազանց սխալ քաղաքականություն, անընդհատ ասում էին՝ «ոչ մի բան տեղի չի ունենում, ամեն ինչ նորմալ է»: Արդյունքում՝ ամբողջը գալիս, լցվում էր ապատեղեկատվությամբ:
Մարդիկ ապրում են պետական սահմանում, մարդիկ ապրում են գյուղում, եկել են ադրբեջանական զինվորականները, շոկի մեջ են մարդիկ հայտնվում, պետությունը փոխանակ գնա նրանց հետ աշխատի, ոչ միայն աշխատանքներ չի տանում, նաև հայտարարում է, թե ամեն ինչ նորմալ է:
Գիտե՞ք՝ ինչ կա: Ես որևէ անգամ չեմ կապում հայկական, ադրբեջանական… ու ընդհանրապես դա շատ արգահատելի դիսկուրս է, որ միացնեն իրար, և այլն: Մենք՝ հայ ժողովուրդը, Հայաստանի քաղաքացիները պետք է մի ուղղությամբ աշխատեն, ոչ թե փոխադարձ մեղադրեն: Բայց գիտե՞ք՝ ինչ կա, Ադրբեջանի նպատակն է հիմա աշխարհին ասել՝ «ամեն ինչ հիանալի է, ոչ մի խնդիր չկա, ի՞նչ ա եղել, Հայաստանն ամեն ինչ… հեն ա՝ իրանք էլ են ասում, որ ամեն ինչ նորմալ է, էդ Հայաստանից որտեղի՞ց եք լսել, որ բողոքեն»: Բա հետո պետությունը ոչ մի բան չի անում ու մեղադրում է մեդիատեռորի մեջ․․․
Ձեր ելույթում կային բացահայտ մանիպուլյատիվ հայտարարություններ՝ սահմանազատում, սահմանագծում: Իսկ Դուք ի՞նչ գիտեք, որ մենք ԱԳՆ-ի հետ չենք աշխատել: Շատ էլ իմ ո՛չ բարոյականությունը, ո՛չ էլ իրավական կաշկանդվածության սահմանները թույլ չեն տալիս՝ ես անցնեմ, քննարկումներին գնահատականներ տամ: Մենք ամեն օր ենք մեր գործընկերների հետ կապի մեջ: Ես ողջ կոնյունկտուրան հասկանում եմ, տիկին Կարապետյան: Ես միամիտ չեմ: Ես աշխատել եմ կառավարությունում, աշխատել եմ միջազգային կառույցներում, քաղաքացիական հասարակությունում, Հայաստանի ՄԻՊ-ի պաշտոնում եմ աշխատում և միջազգային կառավարման խորհուրդների անդամ եմ: Ես բացահայտ հասկանում եմ՝ ինչ է տեղի ունենում, տիկին Կարապետյան: Ես որևէ քայլ չեմ անում, որ կհակասի մեր երկրի արտաքին քաղաքականությանը: Ես Ձեզ ասում եմ՝ ադրբեջանցիները սպառնում են, ինֆորմացիա եմ տարածում՝ կադաստրային փաստաթղթեր ունեցող մեր բնակիչները զրկվել են իրենց հողատարածքներից, Դուք ինձ ասում եք՝ «ամսի 15-ին ասել ես սահմանազատում բառը, ամսի 17-ին ասել ես սահմանագծում բառը»: Բա դա եղա՞վ: Դա Հայաստանի քաղաքացու իրավունքների պաշտպանությո՞ւն է:
Մի հատ գնանք իրար հետ նայենք, էլի, սահմանին ինչ է կատարվում: Դուք գնացե՞լ եք Գորիսից Շուռնուխ կամ Կապանից Ճակատեն գնացող գյուղի հատվածը, հարց տվե՞լ եք՝ օրինակ, ի՞նչ կլինի, եթե ավտովթար տեղի ունենա, օրինակ, Հայաստանի ու ռուսական ավտոյի միջև կամ Հայաստանի-Հայաստանի, Ադրբեջանի: մերոնք ինձ խորհուրդ են տալիս, ասում են՝ «կամաց երթևեկի, որովհետև նրանք կմտածեն, թե սադրանք է»: Այստեղ մերոնց հարցը չի: Հանկարծ չփորձվի որևէ մեկը քաղաքականացնի, մեր սահմանապահ զորքերը ու Զինված ուժերը անձնուրաց, հերոսական ծառայություն են կատարում: Բայց, օրինակ, մի հատ ավտովթար եղավ, եկան ադրբեջանցիները, իրենց հատվածն է, չէ՞, Դուք էլ ասում եք՝ «ձայն մի հանի», միջազգային կառույցներին էլ ես ձայն չեմ հանում, որպեսզի չլսեն, այո՛, Դուք եք ասում՝ «մեդիատեռորին ես միացել»… Հիմա ես հարց եմ տալիս՝ մեր քաղաքացուն, օրինակ, գալո՞ւ են, բերման ենթարկեն Ադրբեջանի քննչական մարմինները, տարածքային իրավազորություն է, ստացվում է՝ պիտի գան, հարցաքննեն: Ես Արդարադատության նախարարությանը պաշտոնական նամակ եմ գրում, ասում եմ՝ «ժողովուրդ, ի՞նչ եք արել», ոչ էլ հրապարակել եմ այդ նամակը: Այ, որ մանիպուլյացիա չլինի: Այդ մարդիկ էլ չգիտեն՝ ինչ ասեն: Իսկ նման միջադեպ ամեն օր կարող է տեղի ունենալ:
Օրինակ, Դուք կառավարող խմբակցության անդամ եք, Ձեզ հարց տվե՞լ եք, որ քաղաքացու հետ նման դեպք լինի, Դուք ո՞նց եք գնալու՝ նրա իրավունքները պաշտպանեք: Կկարողանա՞ք պաշտպանել, թե՞ տանելու են ձերբակալեն, որպես գերի դարձնեն, հա՞, ի՞նչ է լինելու:
Սա շատ կարևորագույն, սկզբունքային հարց է: Մենք չպիտի ջուր լցնենք Ադրբեջանի ջրաղացին, մեր ամեն բառը պիտի կշռադատված լինի, իսկ իմ բառը կշռադատված է: Կարող եք հարցնել մեր բոլոր դեսպաններին: Մեր բոլոր դեսպանների համար իմ հայտարարությունը… մենք դեսպաններ ունենք, որ անգամ չեն էլ խոսում իմ հետ այլևս, միանգամից վերցնում են, դնում են բլանկի վրա, ուղարկում են միջազգային կառույցներին:
Շատ վիրավորական, բացահայտ մանիպուլյատիվ ելույթ էր Ձեր ելույթը, որով փորձեցիք նսեմացնել Հայաստանի ՄԻՊ-ի աշխատանքը, ավելին, ստիպեցիք ինձ այս կերպ անդրադառնալ: Ես չէի ուզում մտնել այդ թեմաների մեջ, անցած անգամ էլ զսպեցի ինձ, բայց Դուք հատուկ նորից դրա վրա շեշտադրում արեցիք, դա փորձեցիք օգտագործել իմ դեմ:
ՀՀ ՄԻՊ-ի համար կարևոր է արժանապատվությունը: Եվ մի բան էլ: Էդ հայհոյանքներից եք խոսում, բա պաշտոնյաները տեսե՞լ եք՝ ինչեր են անում: Ես բոլոր ապացույցները ունեմ: Հայհոյանքներ են գրում պաշտոնյաները, գրում են, լայքում են բարձրաստիճան պաշտոնյաները: Դա անուղղակի բռնության տարածում է: Այո, գլխավոր դատախազին գրել եմ, խնդրեմ եմ՝ քրեական գործ հարուցի, ԱԱԾ տնօրենի հետ էլ խոսել եմ, խնդրել եմ հատուկ: Այդ պաշտոնյաները պետք է ընդհանրապես պետական կառավարման համակարգի հետ կապ չունենան: Նրանք որտեղի՞ց են եկել, հայտնվել պետական համակարգում, կարո՞ղ եք ինձ ասել: Ի՞նչ գործ ունի Շուկայի տեսչության վերահսկողության մարմնի աշխատակիցը, սեռական հայհոյանք է տալիս համացանցում լրագրողին, կարո՞ղ եք ասել»,- ելույթում ասաց Արման Թաթոյանը:
Մանրամասները՝ 168.am-ի տեսանյութում
