Ալիևը ձևավորել է մեզ ճնշելու պաշար, որի էլեմենտներից մեկն էլ մեր գերիներն են. Թևան Պողոսյան

Մարդկային զարգացման միջազգային կենտրոնի ղեկավար Թևան Պողոսյանի դիտարկմամբ՝ Ադրբեջանում ամենայն հավանականությամբ  կան արդեն ձևավորված սցենարներ, ու հենց դրանք են Ալիևի վերջին հայտարարությունների հիմքում: Այսօր հրավիրված ասուլիսի ընթացքում Պոսոսյանը նշեց նաև, որ Ադրբեջանի նախագահ Իլհամ Ալիևը մեզ ճնշելու պաշար է ձևավորել:

«Երբ Ալիևը ասում է՝ «այո, մենք գնալու ենք հասնենք Իրիվան: Չեմ ասում՝ տանկերով ենք գնալու հասնենք, բայց գնալու ենք հասնենք», ուրեմն արդեն կա, չէ՞, սցենարը: Մարդիկ նստել, քննարկել են, չէ՞, որ ինքը դրա մասին իր հարցազրույցներում ասում է: Իրենք սցենարներ են մշակել: Դա լինելու է  տնտեսական էքսպանսիայի միջոցով: Դրա համար ի՞նչ է  ձևավորել: Ձևավորել է  պաշար, որ մեր վրա ճնշի: Այդ պաշարների էլեմենտներից մեկն էլ նաև մեր գերիներն են, որով մեր վրա ճնշում է գործադրում:

Այ, եթե հիմա՝ մինչ ընտրությունների շրջանակները, մենք տեսնենք, որ հանկարծ պարզապես օդում անհասկանալի ձևով մեզ գերիներ են փոխանցվել, այստեղ էլ եմ սկսելու կասկածել, թե դա արդյոք ադրբեջանական ծրագրի իրականացո՞ւմն է, թե՞ մեր ջանքերի արդյունքն է: Կարող է փորձի, որոշի՝ ինչ-որ մեկ թեկնածուի կամ մեկ քաղաքական թիմի համար դրական ազդեցություն անի»,- ասաց Թևան Պողոսյանը:

Մարդկային զարգացումների միջազգային կենտրոնի ղեկավարի խոսքով՝ ցանկացած պարագայում, երբ Ադրբեջանը գերիներին վերադարձրել է, դրա համար վճարել ենք: Ըստ նրա՝ Ադրբեջանը գերիներին պարզապես չի վերցրել, որ առանց ինչ-որ նպատակի հասնելու՝ վերադարձնի:

«Մինչև հիմա էլ ինչ որ եղել է, եղել է վճար: Վճար եղել է՝ կա՛մ մենք ենք հետ տվել ինչ-որ մարդկանց, եղել է կա՛մ ինչ-որ մի տեղ զիջումների ենք գնացել: Ուզում է  երրորդ կողմն էլ ջանքեր ներդնի, միևնույն է՝ այդ ջանքերի համար վճար է լինելու, այդ վճարը մեր հաշվին է լինելու: ԱՄՆ-ը կբանակցի վաղը, ԵՄ-ն կբանակցի, անհատներ կբանակցեն, ՌԴ-ն կբանակցի, որևէ մեկը կբանակցի, ու ինչ-որ վերադարձի հնարավորություն է լինելու, միևնույն է, դրա համար վճար է  լինելու, և այդ վճարը վճարելու է Հայաստանը, հայ ազգը կամ Հայքը, ոնց ուզում եք, ասեք, որ միասնական հասկանաք»,- նշեց նա:

Պողոսյանի խոսքով՝ վճարը կարող է լինել՝ ինչպես քողարկված որևէ բան, այնպես էլ՝ բացահայտ, օրինակ, ինչ-որ պայմանագրի ստորագրում: Ու ըստ նրա, եթե գերիների վերադարձը չի լինելու մեր ճնշումային գործիքով, ուրեմն մենք վճարելու ենք դրա համար:

«Մեր ճնշումային գործիքները կարող են լինել երկուսը: Կամ  մենք կարողանում ենք այնպես ձևավորել, որ նույն քանակի գերիներ ենք ունենում, և իրենք գնում են փոխանակման՝ բոլորը բոլորի դեմ, որը չունենք, կա՛մ երկրորդը՝ ինչ-որ ունակություններ ենք ձևավորում, որտեղ Ադրբեջանին մեծ ցավ ենք պատճառում, ու մենք լավ գիտենք, որ դա մենք ենք արել, ոչ թե ուրիշն է արել»,- ասաց Պողոսյանը՝ նշելով, թե դա կարող է լինել, օրինակ, միջազգային ատյաններում ինչ-որ օրենքներ ընդունելը կամ ինչ-որ սանկցիաներ կիրառելը:

Մանրամասները՝ 168.am-ի տեսանյութում