Ավագանու իմքայլական անդամները շարունակում են հեռանալ՝ վայր դնել մանդատները, դուրս գալ խմբակցությունից
Այսօր Երևանի ավագանու հերթական նիստը սկսեց փոխքաղաքապետ Հրաչյա Սարգսյանը, քանի որ Երևանի քաղաքապետ Հայկ Մարությանն ուշանում էր: Օրակարգին անցնելուց առաջ Սարգսյանը հայտնեց, որ ավագանու «Իմ քայլը» խմբակցության մի քանի անդամ վայր են դրել իրենց մանդատնրը:
««Իմ քայլը» կուսակցությունների դաշինքի, Երևան քաղաքի ընտրական ցուցակով ընտրված, Երևան քաղաքի ավագանու անդամներ Հայկ Սիրունյանն ու Մեսրոպ Պապիկյանը դիմումներ են ներկայացրել ավագանու անդամի լիազորությունները դադարեցնելու մասին»:
Ավելի վաղ մանդատը վայր էր դրել նաև ավագանու «Իմ քայլը» խմբակցության անդամ Արսեն Կարապետյանը: Ավագանու երեք անդամներին փոխարինողներից մեկը ևս վայր է դրել մանդատը:
«Արսեն Կարապետյանի, Հայկ Սիրունյանի ու Մեսրոպ Պապիկյանի մանդատները տրվել են «Իմ քայլը» կուսակցությունների դաշինքի ընտրական ցուցակի հերթական հաջորդ թեկնածուներ Սերգեյ Գյոզալյանին, Վահե Օհանջանյանին և Կարինե Փանոսյանին: Կարինե Փանոսյանը դիմում է ներկայացրել ավագանու անդամի լիազորությունները դադարեցնելու մասին»:
Կարինե Փանոսյանի մանդատը տրվել է «Իմ քայլը» կուսակցությունների դաշինքի ընտրական ցուցակի հերթական հաջորդ թեկնածու Գևորգ Աճեմյանին:
«Իմ քայլը խմբակցության անդամներ Էռնեստ Ավանեսովը և Սերգեյ Գյոզալյանը դիմումներ են ներկայացրել խմբակցության կազմից դուրս գալու մասին: Նրանք շարունակում են ավագանու անդամի իրենց լիազորությունները և համապատասխան հանձնաժողովում աշխատանքները»:
