Իմքայլական ավագանիներից մեկը հրաժարվել է մանդատից, մյուսը՝ դուրս եկել խմբակցությունից
Երևանի ավագանու նիստը վարում էր փոխքաղաքապետ Հրաչյա Սարգսյանը, քանի որ քաղաքապետ Հայկ Մարությանը վատառողջ է: Նիստը սկսվեց մեկ րոպե լռությամբ՝ հարգելով Արցախյան հերոսամարտում զոհվածների հիշատակը: Հրաչյա Սարգսյանը տեղեկացրեց, որ ավագանու «Իմ քայլը» խմբակցության անդամներից մեկը դադարեցրել է ավագանու իր լիազորությունները, իսկ մյուսն ուղղակի դուրս է եկել խմբակցության կազմից:
««Իմ քայլը» կուսակցությունների դաշինքի Երևան քաղաքի ընտրական ցուցակով ընտրված Երևան քաղաքի ավագանու անդամ Արսեն Կարապետյանը դիմում է ներկայացրել ավագանու իր անդամի լիազորությունները դադարեցնելու մասին: «Իմ քայլը» խմբակցության անդամ Իզաբելլա Աբգարյանը դիմում է ներկայացրել խմբակցության կազմից դուրս գալու մասին: Որպես պարզաբանում՝ տեղեկացնում եմ, որ Իզաբելլա Աբգարյանը շարունակում է ավագանու անդամի իր լիազորությունները և համապատասխան հանձնաժողովում իր աշխատանքները»,- ասաց Սարգսյանը:
Մինչև ավագանու օրակարգին անդրադառնալը խոսք խնդրեց ավագանու ԲՀԿ խմբակցության ղեկավար Միքայել Մանրիկյանը:
«Գրությամբ դիմել ենք քաղաքապետին, որով հրաժարվում ենք Քաղաքաշինության և հողօգտագործման հանձնաժողովի փոխնախագահի մեր հաստիքից: Դիմել ենք քիչ առաջ»,- տեղեկացրեց Մանրիկյանը:
