Յուրաքանչյուրի կյանքը թանկ է մեզ համար․ Առողջապահության նախարարություն
«Ժողովուրդ» օրաթերթն այսօրվա համարում կրկին հիշել է առողջապահական համակարգը, այս անգամ մտահոգությունների փոխարեն` անցնելով լուրջ մեղադրանքների։
Հիմա էլ պարզվում է, թե «նախարարությունը ծանոթով է պացիենտներին հոսպիտալացնում»։
Մեջբերենք մի հատված. «Հնարավոր է՝ գործի նախարարությունում, այսպես ասած, ծանոթ գտնելու տարբերակը: Ահա թե ինչպես են Հայաստանի առողջապահության նախարարությունում պատրաստվել կորոնավիրուսի երկրորդ ալիքին»։
Անհասկանալի է «Ժողովուրդ» օրաթերթի պահվածքն այս օրերին, որը ջանք չի խնայում, շարունակաբար ցեխ է շպրտում` թիրախավորելով մի գերատեսչության, որն այս պահին զբաղված է հազարավոր կյանքեր փրկելով։
«Ժողովուրդ» օրաթերթի խմբագրությանը խորհուրդ ենք տալիս դիտողականություն ձեռք բերելու այլ տարբերակներ փնտրել և հանգիստ թողնել արդեն իսկ ծանրաբեռնված և գերլարումով աշխատող համակարգը:
Այս պահին բժշկական կենտրոններում բուժում են ստանում առաջնագծում կռիվ տված, վիրավորում ստացած մեր զինվորները և դրան զուգահեռ նաև անտեսանելի թշնամու՝ կորոնավիրուսի հետևանքով ծանր և ծայրահեղ ծանր վիճակում գտնվող պացիենտները։
Այո’, նրանք բոլորն էլ մեր «ծանոթներն են», մեր հայրենակիցները, և նրանցից յուրաքանչյուրի կյանքը թանկ է մեզ համար: Եվ, ցավոք, մինչ դուք Ձեր հերթական մեղադրանքներն եք «հորինում», նրանցից ոմանք մահանում են, և մահճակալներն ազատվում են հերթագրված հիվանդներին ծառայելու համար:
Իսկ թե «ինչպես է պատրաստվել կորոնավիրուսի երկրորդ ալիքին նախարարությունը», անցե’ք այս հղումով։
