«Նիկոլ Փաշինյանի և Ալիևի միջև հաստատված ուղիղ կապը կարողացել է կանխել որոշակի հնարավոր սադրանքներ, էսկալացիաներ». Տաթևիկ Հայրապետյան

ԱԺ «Իմ քայլը» խմբակցության պատգամավոր Տաթևիկ Հայրապետյանի կարծիքով՝ Ադրբեջանի նախագահ Ալիևի ելույթը չէր տարբերվում Սադամ Հուսեյնի կամ Քադաֆիի ելույթներից, որոնք ժողովրդավարության մասին խոսում էին՝ որպես չարիքի:

«Այսինքն՝ դա բռնապետի լեքսիկոնին հատուկ, բռնապետի վախերն արտահայտող ելույթ էր»,- 168TV-ի «Ռեվյու» հաղորդման ընթացքում ասաց նա:

Հարցին՝ հաշվի առնելով այն, որ Նիկոլ Փաշինյանն Ալիևի վերաբերյալ կոշտ չի արտահայտվում, հակառակը՝ նրան համարում է կիրթ և կառուցողական, ինչո՞ւ է Ադրբեջանի նախագահն այսպես պատասխանում Փաշինյանին, Դուք ասում էիք, որ Փաշինյանը նման կերպ դիվանագիտական ժեստ է անում, ինչո՞ւ դա չգնահատվեց, նա պատասխանեց.

«Ես մնում եմ իմ համոզմանը, որ՝ այո՛, որոշակի ժեստեր արվում են վարչապետի կողմից՝ դիվանագիտական տեսանկյունից: Այն, որ Ադրբեջանի նախագահը՝ Ձեր նշածով՝ չի գնահատում, միայն վնասում է իրեն, որովհետև Ալիևի այդ ելույթի վերաբերյալ իրենց մտահոգությունները արտահայտվեցին նաև ԵԱՀԿ ՄԽ համանախագահների մամուլի հաղորդագրության մեջ»:

Համանախագահների հայտարարության մեջ ասված է․ «Համանախագահները մտահոգությամբ են արձանագրել, որ վերջին սադրիչ և հրահրող հռետորաբանությունը և տեղում իրավիճակը փոխելուն ուղղված հնարավոր քայլերը կարող են խափանել կարգավորման գործընթացը»:

Մեր նկատառմանը, որ հայտարարության մեջ հավասարության նշան է դրված կողմերի միջև, Տ․ Հայրապետյանը պատասխանեց․ «Եկեք՝ ծուռը նստենք, դուզը խոսենք՝ ո՞ր կողմից են հնչել նման հայտարարություններ»:

Դիտարկմանը՝ մենք դա գիտենք, բայց կոնկրետ Ադրբեջանին չեն մատնանշում, նա այսպես արձագանքեց.

«Այդ հայտարարությունները միշտ եղել են ավելի ընդհանրական և բալանսավորված, բայց միշտ ուղղված են եղել Ադրբեջանին: Բնական է, որ համանախագահները փորձում են ավելի զգուշավոր լինել՝ հասկանալով իրենց առաքելությունը և մթնոլորտի առողջացմանն ուղղված իրենց քայլերը, բայց այնքան ակնհայտ է, որ դա Ադրբեջանին է ուղղված: Եթե ադրբեջանական կողմն է նման հայտարարություն անում, ուրեմն՝ իրենց է ուղղված: Հիշեցրեք ինձ մեկ դեպք, երբ հայկական կողմերից որևէ մեկից նմանատիպ ռազմատենչ կոչեր են հնչել: Մենք մշտապես խոսում ենք խաղաղության, խաղաղ բանակցությունների, խնդրի խաղաղ կարգավորման անհրաժեշտության մասին, և ի ուրախություն ինձ՝ դա արտացոլվեց նաև վերջին հայտարարության մեջ: Այսինքն՝ այն օրակարգը, որի մասին առիթ ենք ունեցել այս տաղավարում քննարկել, դառնում է միջազգային օրակարգի մի կարևոր մաս, որը վերաբերում է մթնոլորտի առողջացմանը: Առանց համապատասխան մթնոլորտի ստեղծման, ուղղակի, բանակցություններ հնարավոր չեն: Նախարարի արտահայտած այն դրույթը, որ ես չեմ բանակցելու ձեզ հետ ատրճանակը իմ ճակատին պահած, գնալով միջազգային հանրության համար դառնում է ավելի ընկալելի, դրա վերաբերյալ համապատասխան հղումներ են արվում»:

Հիշեցրինք, որ մինչև ՌԴ ԱԳ նախարար Լավրովի հայտարարությունը՝ Հայաստանի իշխանություններն ասում էին, որ բանակցություններ չկան, խորհրդակցություններ են, իսկ դրանից հետո ասվեց, որ կան բանակցություններ:

«Այստեղ փոքր-ինչ տարընթերցումների խնդիր կա՝ խոսքը փաստաթղթի առկայության մասին է՝ կա՞ այդ փաստաթուղթը սեղանին: Եթե քննարկողների մի մասը մտածում է, որ առանց փաստաթղթի չկա բանակցություն, ուրեմն չկա բանակցություն, որովհետև չկա փաստաթուղթ, իսկ եթե մենք ասում ենք, որ կա բանակցություն անգամ, երբ չկա փաստաթուղթ, բայց կա քննարկում միջավայրի մասին, ուրեմն՝ կա բանակցություն: Այսինքն՝ ընկալումների խնդիր է»,- պարզաբանեց նա:

ԵԱՀԿ ՄԽ համանախագահների վերջին հայտարարության մեջ նաև ասվում է. «Համանախագահներն ընդգծել են կարևորությունն այնպիսի մթնոլորտի ձևավորման, որը կնպաստեր խաղաղությանը և կլիներ բարենպաստ՝ առարկայական բանակցությունների համար»։

Մեր հարցին, թե ի՞նչ առարկայական բանակցությունների մասին է խոսքը, Տ․ Հայրապետյանը պատասխանեց, որ համանախագահները խոսում են այն մասին, ինչի մասին խոսում են ՀՀ իշխանությունները.

«Մենք ասում ենք՝ գնացինք օրակարգով, և որոնք են այդ կետերը՝ միջավայրի բարելավում, Արցախի վերադարձ բանակցային սեղան և առարկայական բանակցություններ, այսինքն՝ խոսակցություն խաղաղության մասին՝ ինչպես ենք մենք հասնում դրան: Մենք դեռևս գտնվում ենք շատ նախնական փուլում, երբ ընդամենը փորձում ենք միջավայրի կարգավորման մասին խոսել, ինչ-որ փուլերում դա աշխատում է, ինչ-որ փուլերում Ադրբեջանը կրկին հունից դուրս է գալիս, և նմանատիպ հայտարարություններ անում՝ խախտելով ամբողջ տրամաբանությունը: Բնականաբար, մենք շարունակում ենք խոսել նաև Արցախի վերադարձի մասին՝ բանակցային սեղան: Առարկայական բանակցություն ասելով՝ ես հասկանում եմ՝ երբ 3 կողմերը կնստեն բանակցային սեղանի շուրջ, և կդրվի, օրինակ՝ փաթեթ կամ քննարկում՝ արդյո՞ք մենք համաձայնության գալիս ենք այս փաթեթի շուրջ, թե՞ ոչ: Քանի դեռ չկա նման բան, չենք կարող խոսել Ձեր նշած՝ առարկայական բանակցության մասին»:

Նա նաև հավելեց, որ Վիեննայի և Սանկտ Պետերբուրգի պայմանավորվածությունները դուրս չեն մղվել օրակարգից. «Ես, իհարկե, կցանկանամ, որ հետագա մեր քայլերով հասնենք նրան, որ ուղղակի հղում կատարվի Վիեննայի և Սանկտ Պետերբուրգի պայմանավորվածություններին, որոնք Ադրբեջանը շարունակորեն ժխտում է ընդունել, և դրանով նաև առաջ գնանք: Դրանք երբեք օրակարգից դուրս չեն եկել: Խնդիրն այն է՝ արդյո՞ք Ադրբեջանն այն ամբողջությամբ ընդունում է, թե՞ մի դրույթ ընդունում է և հետո դիվանագիտորեն վաճառում մեզ վրա՝ ասելով, որ՝ այն մի դրույթն ընդունել եմ, ուրեմն՝ ամբողջն եմ ընդունել: Իսկ ամբողջն Ադրբեջանը չի ցանկանում ընդունել, բայց դրանք չեն կարող օրակարգից դուրս գալ, դրանք փոխվստահության մեխանիզմների զամբյուղի կարևոր հիմնաքարերն են հանդիսանում, բնականաբար, դրանք օրակարգում են»:

Ինչ վերաբերում է ԵԱՀԿ ՄԽ համանախագահների հայտարարության այն հատվածին, որտեղ խոսվում է ուղիղ կապի մասին, Տաթևիկ Հայրապետյանը նշեց, որ խոսքը Նիկոլ Փաշինյանի և Ալիևի միջև հաստատված ուղիղ կապի մասին է, որը, ըստ նրա՝ հայկական կողմի նախաձեռնությամբ է հաստատվել.

«Ես ուղղակի որոշակի տեղեկություն ունեմ, որ այդ ուղիղ կապն իսկապես որոշակի հնարավոր սադրանքներ, էսկալացիաներ կարողացել է կանխել»:

Մանրամասները՝ 168TV-ի տեսանյութում