«Տոտենհեմի» պատմության ամենաթանկ ֆուտբոլիստը հրաժարվել է խաղալ Մոուրինիոյի գլխավորությամբ
«Տոտենհեմի» կիսապաշտպան Թանգի Նդոմբելեն հայտնել է ակումբի գլխավոր մարզիչ Ժոզե Մոուրինիոյին, որ այլևս դուրս չի գա խաղադաշտ նրա գլխավորությամբ:
Անցյալ ամառ Ֆրանսիայի հավաքականի կիսապաշտպանը տեղափոխվեց «Տոտենհեմ»՝ ա կումբի պատմության ամենաթանկ նորեկի կարգավիճակում. լոնդոնցիները նրա համար «Լիոնին» վճարեցին 72.5 միլիոն եվրո: Այդ ժամանակվանից ի վեր խաղացողը չէր կարող դառնալ թիմի կարևոր մաս՝ ո՛չ Մաուրիսիո Պոչետինոյի, ո՛չ էլ Մոուրինիոյի գլխավորությամբ: 23-ամյա ֆուտբոլիստը հույս ուներ, որ կորոնավիրուսով պայմանավորված դադարը դրականորեն կազդի մրցաշրջանի ավարտին նրա խաղաժամանակի վրա, բայց Ժոզեն թույլ չի տալիս նրան մոտենալ կազմին և առիթը բաց չի թողնում ֆուտբոլիստին հրապարակայնորեն քննադատելու համար:
Ինչպես հաղորդում է ESPN-ը, հունիսի 22-ին կոնֆլիկտը հասել է իր գագաթնակետին. ֆուտբոլիստն ու մարզիչը վիճել են մարզման ընթացքում, որից հետո շարունակել են հարաբերությունները պարզել Մոուրինիոյի գրասենյակում: Աղբյուրի համաձայն, Նդոմբելեն պորտուգալացուն ասել է, որ այլևս խաղ չի անցկացնի, քանի դեռ նա մնում է ակումբի գլխավոր մարզիչը:
Պատրաստեց Անի Գաբուզյանը
