«Տաթևիկ Ռևազյանը թաքցրել է այդ ինֆորմացիան․ սա հատուկ արված քայլ է, որպեսզի հայկական ավիացիան վերջնականապես փոշիացնեն»․ Նավիկ Խաչատրյան
Վարչապետ Նիկոլ Փաշինյանն այսօր հեռավար ռեժիմով կառավարությունում խորհրդակցություն է անցկացրել Հայաստանի քաղաքացիական ավիացիայի ոլորտի ներկա իրավիճակի և զարգացման հեռանկարների վերաբերյալ: Քննարկմանը տեսակապի միջոցով մասնակցել է նաև Քաղաքացիական ավիացիայի կոմիտեի նախագահ Տաթևիկ Ռևազյանը:
Տաթևիկ Ռևազյանը նշել է, որ 2019թ. նոյեմբերի 20-ին տեղի ունեցած Եվրոպական թռիչքային անվտանգության թիմի նիստից ի վեր Կոմիտեն շարունակական միջոցառումներ է իրականացնում Հայաստանում թռիչքային անվտանգության մակարդակը բարձրացնելու նպատակով, և որոշման փոփոխության հարցը կարող է քննարկվել 2022 թ. նոյեմբերին:
Տաթևիկ Ռևազյանի այս հայտարարությունը անակնկալի է բերել ավիացիոն ոլորտի փորձագետներին։
Ավիացիոն փորձագետ Նավիկ Խաչատրյանը 168.am-ի հետ զրույցում ասաց, որ այն, ինչ այսօր ասել է Տաթևիկ Ռևազյանը, նախկինում չի եղել ասպարեզում․ «Ավիացիոն մասնագետներն ուշի-ուշով ավիացիայում կատարվող ամեն ինչին հետևում են, և եթե այդ թվի ժամանակ խոսվեր այն ժամանակ՝ 2019 նոյեմբերի 20-ին, մեծ աժիոտաժ կբարձրանար, ընդհուպ, կարող է Տաթևիկ Ռևազյանին հեռացնեին, և նշանակեին որևէ մեկին, որն ավելի լուրջ կընդուներ փետրվարին տեղի ունենալիք անվտանգության աուդիտի թեման և միանշանակ չէր գցի երկրի վարկը։ Այսօր ՔԱԿ-ը նյութ է հրապարակում, որտեղ ասվում է, թե ԵՄ թռիչքային անվտանգության կոմիտեն խոսում է նախկին տարիներին տեղի ունեցած խախտումների մասին․ չկա նման բան, նախկին տարիների մասին ոչ մի խոսք չկա։ Այնտեղ բացի այլ երկրներից ներառված է Հայաստանը և Հայաստանի 6 փոխադրողներ, որոնք ընկած են «սև ցուցակ» և Եվրոպա չեն կարող թռչել՝ անվտանգության վերահսկման նկատառումներով, որի պատասխանատուն ՔԱԿ-ն է, ոչ թե ավիաընկերությունները»։
Նավիկ Խաչատրյանը կատարվածը բնորոշում է որպես երկրի նկատմամբ թշնամական քայլ․ «Սա կարծես երկրի հակառակորդների կողմից արված քայլ լինի՝ ոչնչացնել տեղից էլ ծնկի եկած ավիացիան։ Ասում եմ՝ եթե 2019թ․ նոյեմբերի 20-ին ասվեր այն, ինչ այսօր է ասվել, Տաթևիկ Ռևազյանն իր պաշտոնին չէր մնա, բայց դա մի կողմ, կարևորը՝ շատ մեծ քայլեր կարվեին, որպեսզի այդ աուդիտը փետրվարին կատարվի։ Իսկ փոխարենը երկրի կառույցը ղեկավարող անձն ուղղակի պարտակում է այդ ինֆորմացիան, երևի իմանալով և վախենալով, որ դա մեծ արձագանք կունենա հանրության շրջանում։ Նա թաքցրել է այդ շատ վատ ինֆորմացիան, և հիմա ես առավոտից լրատվամիջոցներին հարցազրույցներ եմ տալիս, ասում եմ՝ եթե վարչապետը փորձի նոր և ուժեղ թիմ հավաքել, անցնել այդ աուդիտը, հաջորդ տարի գուցե արդյունքներ ունենանք, բայց արի ու տես, որ նման բան է տեղի ունեցել, որի մասին ոչ ոք չի իմացել, ինչը հատուկ արված քայլ է, որպեսզի հայկական ավիացիան վերջնականապես փոշիացնեն։ Ես և մյուս ավիացիոն փորձագետները կփորձենք սրա դեմը որոշ չափով առնել՝ անընդհատ բոլոր լրատվամիջոցների հետ զրուցելով։ Սա վատ հետևանքներ կունենա, անընդհատ մտածելու ենք, որ մեր ՔԱԿ-ը ինչ-որ բան է թաքցնում։ Լավ է, որ այսօր բացահայտվեց։ Իհարկե, Նիկոլ Փաշինյանը չի էլ պատկերացնում՝ ինչի մասին է խոսքը»։
Ինչ վերաբերում է ԵՄ «սև ցուցակին», և իշխանության ներկայացուցիչների այն պարզաբանումներին, որ հայկական ավիաընկերությունը միայն Լիոն էր թռչում, Նավիկ Խաչատրյանն ասաց, որ ավիացիայից քիչ թե շատ տեղյակ մարդը գիտակցում է, որ մեծ կառույցները, որոնք հանգրվանում են Բրյուսելում և օդանավերի վարձատուները, որոնք հիմնականում գտնվում են Իռլանդիայում, աշխատում են հետևյալ սկզբունքով․
«Երեկվա «սև թուղթը» բոլորն ունեն և վստահ եմ, նրանց տեղեկացրել են, որ Հայաստանին որևէ օդանավ չտան։ Իսկ որևէ երկրի շահագործող չի կարող օդանավը ձեռք բերել անմիջապես արտադրողից, այլ կարող է ձեռք բերել միայն վարձատուից։ Երեկվա ստացած «սև թղթերը» անմիջապես տարածվում են Բրյուսելի կենտրոնակայաններում ու օդանավի վաճառքով զբաղվող վարձատուների մոտ, բոլորը արդեն գիտեն Հայաստանի մասին, և մեր երկրի ավիացիոն իմիջը լրիվ ընկել է։ Մեզ օդանավ չեն տալու, մինչև դա չվերացվի, իսկ դա կվերացվի 2024թ․ ոչ շուտ»։
