Բուժաշխատողների վարձատրությունը միջինում 2-3 անգամ բարձրացել է. Նիկոլ Փաշինյան
ՀՀ վարչապետ Նիկոլ Փաշինյանի խոսքով՝ Առողջապահության նախարարությունը տեղեկացրել է, որ կորոնավիրուսային համավարակով պայմանավորված, վիրուսի բուժմամբ զբաղվող բուժաշխատողների վարձատրությունը միջինում 2-3 անգամ բարձրացել է:
«Ավելացումները ձևավորել են պարգևատրումների ֆոնդի հաշվին՝ բուժաշխատողների մասնագիտությանը համապատասխան՝ բժիշկ, միջին բուժանձնակազմ և կրտսեր բուժաշխատող: Պարգևավճարներ են ստացել նաև շտապօգնության աշխատակիցները: Առողջապահության նախարարությունը բուժաշխատողների համար ապահովում է նաև կեցության և սննդի հարցը: Ինչ վերաբերում է բուժանձնակազմի պակասին, ապա ներկա պահին համակարգը կարիք ունի անեսթեզիոլոգների և ռեանիմատոլոգների: Մնացած մասով աշխատանքներ է տարել հենց նախարարությունը և կարողացել է աշխատանքներին ներգրավել մեծ թվով կամավորների, կլինիկական օրդինատորների»,- առցանց ճեպազրույցի ժամանակ ասաց վարչապետ Նիկոլ Փաշինյանը:
Նա նաև հավելեց, որ Առողջապահության նախարարությունը և Կառավարությունը միջոցներ են ձեռնարկում հանրապետությունում, բժշկական կարողությունները, մասնավորապես՝ վերակենդանացման բաժանմունքի կարողությունները, ավելացնելու համար:
Վարչապետը նաև ընդգծեց, որ բոլորն ունեն հնարավորություն չեզոքացնելու այդ կարիքը, եթե պահպանեն նվազագույն հակահամաճարակային կանոնները:
