Եթե ամռանը թվերը նվազեն, դա դեռ չի նշանակում, որ աշնանն ու ձմռանը բռնկում չենք ունենա. Թորոսյան
Առողջապահության նախարար Արսեն Թորոսյանը չգիտի, թե կորոնավիրուսի դեմ պայքարի համար բացված հաշվեհամարին հավաքված գումարից որքան է ծախսվել:
«Անկեղծ ասած՝ ծախսված գումարի չափը չգիտեմ, բայց հստակ նպատակը գիտեմ՝ դա պայքարի միջոցառումներն են՝ քաղաքացիների մեկուսացում, սարքավորումներ, դեղեր, բժիշկների աշխատավարձ և այլն»,- այսօր հրավիրված մամուլի ասուլիսի ժամանակ ասաց նախարար Թորոսյանը:
Ինչ վերաբերում է վարակակիրների մեջ թոքաբորբով հիվանդների թվին, ապա նախարարն ասաց, որ այսօրվա դրությամբ կա թոքաբորբով հիվանդ 180 քաղաքացի:
Արսեն Թորոսյանն անդրադարձավ նաև հարցին՝ արդյո՞ք վարակի տարածմանը կարող է խոչընդոտել տաք եղանակը:
«Հաշվի առնելով, որ կորոնավիրուսը ռեսպիրատոր վարակ է, հնարավոր է՝ ամռանն ավելի քիչ թվեր ունենանք, սակայն ինչքան էլ որ լավատեսական սցենար լինի, դա չի նշանակում, որ ձմռանն ու աշնանը մեծ բռնկումներ չեն լինի: Մենք պետք է պատրաստվենք թե ամռանը, որը, հուսանք, կարող է լինել ավելի թեթև, թե գալիք աշնանն ու ձմռանը, որոնք կարող են լինել ծանր այս առումով»,- ասաց նախարարը:
