«Առաջնագծում առաջիկա երկու ամսում խոշորամասշտաբ գործողությունները քիչ հավանական են». Տիգրան Աբրահամյան
Տարածաշրջանում ստեղծված իրավիճակով պայմանավորված՝ 168.am-ը մի քանի հարց է ուղղել Արցախի Հանրապետության նախագահի անվտանգության հարցերով խորհրդական Տիգրան Աբրահամյանին:
– Իրան–ԱՄՆ բախումների ֆոնին հնարավո՞ր են սահմանային սրացումներ, Ադրբեջանը կօգտվի՞ առկա իրավիճակից, և ո՞ր ուղղությամբ:
– Այս փուլում Ադրբեջանում ավելի շատ զբաղված են փետրվարին կայանալիք խորհրդարանական ընտրություններով, և չեմ կարծում, թե մինչև նոր խորհրդարանի և կառավարության ամբողջական ձևավորումն Ադրբեջանն առաջնագծում լուրջ գործողությունների կգնա: Իհարկե, ասածս չի բացառում, որ սրացումներ, փոքր մասշտաբային սադրանքներ կլինեն, այնուամենայնիվ, առաջնագծում խոշորամասշտաբ գործողություններ առաջիկա երկու ամսում քիչ հավանական են:
– Ամեն դեպքում, Արցախում տարածաշրջանային իրավիճակը հաշվի առնելով՝ հատուկ զգոնություն պահպանվո՞ւմ է:
– Բնականաբար: Ստեղծված իրադրության պայմաններում նախագահ Բակո Սահակյանն օրեր առաջ աշխատանքային խորհրդակցություն անցկացրեց: Ստացված հանձնարարականների շրջանակներում, համապատասխան կառույցներն իրավիճակին համահունչ օպերատիվ աշխատում են:
– Իսկ ի՞նչ ազդեցություն կունենան ընթացող տարածաշրջանային և մերձավորարևելյան զարգացումները ԼՂ խնդրի կարգավորման գործընթացի վրա, երբ ԱՄՆ–ը՝ որպես համանախագահող երկիր, զբաղված է այլ խնդրով՝ Իրանի հետ կապված:
– Հասկանալի է, որ ոչ միայն ԱՄՆ-ը, այլև ամբողջ աշխարհը կենտրոնացած է Մերձավոր Արևելքում տեղի ունեցող զարգացումների վրա: Կան երկրներ, որոնք շահագրգռված չեն հարակից երկրներում նոր լարվածության օջախների ստեղծմամբ, կան երկրները, որոնք հակառակ մոտեցումն ունեն:
Շատ բան կախված է նրանից, թե, ի վերջո, ԱՄՆ-Իրան զարգացումներն ինչպիսի մասշտաբ կընդգրկեն, ինչ ժամանակահատված և ինչ ելքով:
