ԱՄՆ-ը վերսկսել է նավթի հանքավայրերի պարեկումը Սիրիայում
Ամերիկյան բանակի զինծառայողները Սիրիայի հյուսիս – արեւելքում վերսկսել են նավթի հանքավայրերի շրջանի պարեկումը: Այդ մասին հայտնել է Anadolu գործակալությունը: «ԱՄՆ-ի բանակի զինվորականները հինգ զրահապատ փոխադրամեքենաներով եւ երկու պիկապներով կատարել 40-կիլոմետրանոց գոտու պարեկում Ռումեյլանի եւ Քահթանիայի շրջանների միջեւ՝ սիրիա-թուրքական սահմանից վեց կիլոմետր հեռավորությամբ»,- ասված է գործակալության հաղորդագրության մեջ:
Ավելի վաղ Պենտագոնի ղեկավար Մարկ Էսփերը հայտարարել է, որ ԱՄՆ-ը Սիրիայում կպաշտպանի նավթի հանքավայրերը եւ ուժով կպատասխանի դրանց զավթման փորձերին: Նրա խոսքով՝ ամերիկացի զինվորները մտադիր չեն այնտեղ թողնել ո՛չ Ռուսաստանին, ո՛չ էլ սիրիացի զինվորականներին:
ՌԴ-ի արտաքին գործերի նախարար Սերգեյ Լավրովը հայտարարել է, որ Սիրիայում նավթի հանքավայրերի շահագործման՝ ԱՄՆ-ի մտադրությունն ապօրինի Է, եւ Մոսկվան կպաշտպանի այդ դիրքորոշումը Վաշինգտոնի հետ շփումների ընթացքում, հաղորդել է ՌԻԱ Նովոստին:
