ՏՄՊՊՀ նախագահը՝ բենզինի, դիզվառելիքի, ավիավառելիքի շուկայում ուսումնասիրությունների և գնային քաղաքականության մասին

ՏՄՊՊՀ նախագահ Գեղամ Գևորգյանը լրագրողների հետ ճեպազրույցում հաստատեց նախօրեին փոխվարչապետ Տիգրան Ավինյանի հայտարարությունը, թե Տնտեսական մրցակցության պաշտպանության հանձնաժողովն ուսումնասիրություններ է իրականացնում բենզինի, դիզվառելիքի, ավիավառելիքի շուկայում:

ՏՄՊՊՀ նախագահն ասաց, որ 3 ամսից ավելի է, ինչ ուսումնասիրություններ են ընթանում, և ավարտից հետո եզրակացությունները կներկայացվեն հանրությանը։

Գ. Գրիգորյանը բենզինի երկու շուկա առանձնացրեց. «Մեծածախ վաճառքը, որը ներկրում է իրականացնում, և մանրածախը, որտեղ խնդիրները փոքր են՝ անզեն աչքով էլ կարող եք տեսնել, որ օրենքի շատ պահանջներ բենզալցակայանների կողմից չեն պահպանվել»:

Արձագանքելով լրագրողի հարցին, թե բենզինի գնի նվազումն արդյո՞ք ՏՄՊՊՀ միջամտության արդյունքն է՝ նա պատասխանեց՝ շուկայական փոփոխությունների արդյունք է, քանի որ մրցակցության պաշտպանությամբ զբաղվող հանձնաժողովը չպետք է ուղիղ միջամտություն իրականացնի, այլ դաշտը կարգավորելով՝ պետք է ուղղորդեն տնտեսվարողներին, որպեսզի վերջիններս ճիշտ մրցակցեն։

Ի դեպ, նա տեղեկացրեց նաև, որ բենզինի ներկրման ու գնի վրա մի քանի հանգամանք է անդրադառնում՝ միջազգային գները և տրանսպորտային ծախսերը. «Մեր հիմնական աղբյուրը հանդիսանում է ՌԴ-ն. Կա ՀՀ-ին տրվող քվոտավորված բենզին՝ մոտ 150 հազար տոննա, որը բաշխվում է ՀՀ երեք խոշոր ներկրողների միջև»։

Հիշեցնենք` հոկտեմբերի 2-ին ԱԺ-ում կառավարության հարցուպատասխանի ժամանակ ՀՀ փոխվարչապետ Տիգրան Ավինյանը հայտարարել էր, որ Տնտեսական մրցակցության պաշտպանության պետական հանձնաժողովը ստուգումներ է իրականացնում բենզինի, դիզվառելիքի ու ավիավառելիքի ոլորտներում։ Նա նշել էր նաև, որ դրանց ավարտից հետո ՀՀ կառավարությունը ոլորտի կարգավորման նպատակով անհրաժեշտ քաղաքականություն կմշակի։

Մանրամասները՝ տեսանյութում