ՀՀ մշտական ներկայացուցչությունը ՄԱԿ-ի կենտրոնակայանում կազմակերպել է կանանց և երիտասարդների ներգրավվածությանը նվիրված կլոր-սեղան քննարկում
ՄԱԿ-ի կենտրոնակայանում մայիսի 28-ին տեղի է ունեցել ՀՀ մշտական ներկայացուցչության կազմակերպած «Կանայք և երիտասարդները որպես փոփոխությունների շարժիչ ուժ․ քաղաքացիական ներգրավվածությունից որոշումների կայացում» խորագրով կլոր սեղան-քննարկում։ Այս մասին տեղեկացրին ՀՀ արտաքին գործերի նախարարության լրատվության և հանրային դիվանագիտության վարչությունից:
«Քննարկմանը որպես բանախոսներ հանդես եկան ՀՀ Ազգային ժողովի արտաքին հարաբերությունների մշտական հանձնաժողովի նախագահ Ռուբեն Ռուբինյանը, ՄԱԿ-ի գլխավոր քարտուղարի՝ մարդու իրավունքների հարցերով փոխտեղակալ, Մարդու իրավունքների հարցերով բարձր հանձնակատարի գրասենյակի ղեկավար Էնդրյու Գիլմորը, ՄԱԿ-ի գենդերային հավասարության և կանանց առաջխաղացման մարմնի, քաղաքացիական հասարակության բաժնի տնօրեն Լոպա Բաներժեն և Նյու Յորքի քաղաքային համալսարանի դասախոս, Ռուզվելտի կենտրոնի հանրային քաղաքականության ծրագրի տնօրեն Շյամա Վենկատեսվարը։
Ռուբեն Ռուբինյանն անդրադառնալով Հայաստանի կյանքում վերջին մեկ տարվա ընթացքում կանանց և երիտասարդության ներգրավվածության շեշտակի ավելացմանը՝ ներկայացրեց Թավշյա հեղափոխությանը նախորդած զարգացումները և քաղաքացիական հասարակության մասնակցությունը հայաստանյան վերափոխումների գործընթացում:
Միջոցառմանը բացման խոսքով ելույթ ունեցավ ՄԱԿ-ում ՀՀ մշտական ներկայացուցիչ Մհեր Մարգարյանը՝ նշելով, որ կանայք և երիտասարդները կանգնած են եղել Հայաստանում 2018թ. ապրիլ-մայիս ամիսներին տեղի ունեցած խաղաղ քաղաքական փոփոխությունների ակունքներում: ՀՀ դեսպանի կողմից ընդգծվեց Հայաստանի կառավարության՝ մարդու իրավունքների և ազատությունների պաշտպանությանն, օրենքի գերակայությանն ու կոռուպցիայի դեմ պայքարին ուղղված բարեփոխումներ իրականացնելու հանձնառությունը։
Քննարկման ընթացքում մասնակիցների կողմից անդրադարձ կատարվեց քաղաքական և սոցիալ-տնտեսական կյանքում կանանց և երիտասարդների դերին, ընդգծվեց կայուն զարգացման նպատակների իրականացման առումով քաղաքացիական հասարակության ակտիվ ներգրավվածության, մարդու իրավունքների պաշտպանության և հավասար իրավունքների և հնարավորությունների ապահովման կարևորությանը»,- նշված է հաղորդագրության մեջ։
