ԱՄՆ-ը հակահրթիռների հաջող փորձարկում է իրականացրել Խաղաղ օվկիանոսում
ԱՄՆ-ի զինված ուժերը հակահրթիռային պաշտպանության համակարգի վարժանքների շրջանակում, որոնց ընթացքում առաջին անգամ երկու հակահրթիռների համազարկային արձակում է իրականացվել, մարտի 25-ին հաջողությամբ միջմայրցամաքային բալիստիկ հրթիռ (ՄԲՀ) են կալանել Խաղաղ օվկիանոսի երկնքում: Այդ մասին հայտնել է ԱՄՆ-ի Հակահրթիռային պաշտպանության գործակալությունը:
«Այսօր միջմայրցամաքային բալիստիկ հրթիռի կալանման հաջող փորձարկում կատարվեց,- ասված է Հակահրթիռային պաշտպանության գործակալության հաղորդագրության մեջ:- Դա ՄԲՀ-ի առաջին միաժամանակյա կալանումն էր ցամաքային բազավորման երկու հակահրթիռների համազարկային արձակման ընթացքում»:
Տեղական զանգվածային լրատվամիջոցները նշում են, որ դա ԱՄՆ-ի մայրցամաքային մասի հակահրթիռային պաշտպանության համակարգի առաջին հաջող փորձարկումն է սկսած 2017 թվականի մայիսից:
2020 թվականի նոր ռազմական բյուջեի շրջանակում Պենտագոնն 9,4 միլիարդ դոլար է պահանջել հակահրթիռային պաշտպանության համակարգի զարգացման ծրագրի համար, հաղորդել է «Ինտերֆաքսը»:
