Ոստիկանության շենքից նետված Լևոն Գուլյանի ընտանիքին կվճարվի 52 հազար Եվրո
ՀՀ կառավարությունը 52 000 եվրո կվճարի 2007թ-ին ոստիկանության շենքից նետված Լևոն Գուլյանի ընտանիքին: Այսօր նման որոշում կայացրեց կառավարությունը հերթական նիստում`ի կատարումն Մարդու իրավունքների եվրոպական դատարանի «Գուլյանն ընդդեմ Հայաստանի» գործով 2018 թվականի սեպտեմբերի 20-ին կայացրած վճռի:
Լևոն Գուլյանը մահացել է 2007 թվականի մայիսին, ոստիկանական բաժանմունքում, հարցաքննությունից հետո: Նախաքննական վարկածի համաձայն՝ նա մահացել է փախուստի փորձ կատարելու ժամանակ՝ դուրս նետվելով ոստիկանության շենքի երկրորդ հարկի պատուհանից: Գուլյանի հարազատներն ու իրավապաշտպանները, սակայն, ապացույցներ են ներկայացնում, որ նրան ստորացրել ու դաժան խոշտանգումների են ենթարկել ոստիկանական բաժանմունքում:
