Կանադայի ռադիոկայանները դադարել են եթեր տալ Ջեքսոնի երգերը
Մոնրեալի եւ Քվեբեկի նահանգի մյուս քաղաքների խոշորագույն ռադիոկայանները դադարել են եթեր արձակել Մայքլ Ջեքսոնի երգերը՝ փոփ-երաժշտության արքայի հասցեին մանկապղծության նոր մեղադրանքների պատճառով, որոնք նրա դեմ առաջադրվել են Leaving Neverland վավերագրական ֆիլմի հերոսների կողմից: Այդ մասին հայտնել է CBC հեռուստաալիքը: Խոսքը վերաբերում է CKOI, Rythme եւ The Beat, ինչպես նաեւ մի քանի այլ ռադիոկայանների, որոնք մտնում են Cogeco Media մեդիահոլդինգի մեջ:
Ընդհանուր առմամբ դրա կառավարման ներքո են գտնվում 20-ից ավելի ռադիոկայաններ: «Մենք ուշադիր ենք ռադիոլսողների մեկնաբանությունների նկատմամբ, որոնք արվել են (Leaving Neverland) վավերագրական ֆիլմի թողարկումից հետո»,-պարզաբանել է հոլդինգի ներկայացուցիչ Քրիստին Դիքերը: Նա հավելել է, որ Cogeco Media-ի ռադիոկայանների լսարանը գնահատվում է շաբաթական 5 մլն ունկնդիր:
HBO հեռուստաալիքով մարտի 4-ի երեկոյան տեղի է ունեցել Leaving Neverland («Հեռանալով «Նեւեռլենդից») վավերագրական ֆիլմի երկրորդ՝ եզրափակիչ մասի պրեմիերան, որը պատմում է Մայքլ Ջեքսոնի նկատմամբ մանկապղծության նոր մեղադրանքների մասին: Կինոնկարի առաջին մասը լայն հանդիսատեսին ցուցադրվել էր մարտի 3-ի երեկոյան: Վավերագրական ֆիլմը ներկայացնում է երկու երիտասարդների՝ Ուեյդ Ռոբսոնի եւ Ջեյմս Սեյֆչաքի պատմությունը, որոնք, իրենց խոսքով, համապատասխանաբար 7 եւ 11 տարեկանում երաժիշտի կողմից քանցիս սեռական ոտնձգությունների են ենթարկվել նրա Neverland ռանչոյում:
Հաշխարհային ճանաչում ունեցող ամերիկացի երգիչ, երգերի հեղինակ, պրոդյուսեր եւ պարող Մայքլ Ջեքսոնը Grammy 13 մրցանակի դափնեկիր է: Նա նաեւ արժանացել է Grammy-ի երաժիշտ-լեգենդ (1993 թ.) եւ ակնառու ձեռքբերումների համար (2010, հետմահու) պատվավոր մրցանակներին: Աշխարհում վաճառվել է նրա ձայնագրությունների ավելի քան 1 մլրդ օրինակ: Forbes հանդեսի տվյալներով՝ Ջեքսոնը գլխավորում է հայտնի մարդկանց վարկանիշը, որոնց մշակութային ժառանգությունը նույնիսկ մահվանից հետո շարունակում է եկամուտներ բերել, հաղորդել է ՏԱՍՍ-ը:
