«Դե, փորձեք մարսել այս թվերը՝ առանց հիշելու մանկապարտեզների պատուհաններն ու հնամաշ գույքը». Էջմիածնի քաղաքապետի ժամանակավոր պաշտոնակատար
Էջմիածնի քաղաքապետի ժամանակավոր պաշտոնակատար Դիանա Գասպարյանը ներկայացրել է 2014-2018 թթ․ Էջմիածնի քաղաքապետարանի «Համաքաղաքային միջոցառումների կազմակերպում» տողի ներքո իրականացված ծախսերը:
Դիանա Գասպարյանը ֆեյսբուքի իր էջում գրել է, որ նշված ժամանակահատվածում «Համաքաղաքային միջոցառումների կազմակերպում» տողի ներքո ծախսվել է 169,119, 235 ՀՀ դրամ։
Ներկայացնելով մանրամասները՝ նա նշել է, որ ըստ տարիների ծախսվել են հետևյալ գումարները՝ 2014 թվականին՝ 44,568,560 ՀՀ դրամ, 2015 թվականին՝ 44,264,851 ՀՀ դրամ, 2016 թվականին՝ 35,073,574 ՀՀ դրամ, 2017 թվականին՝ 45,212,250 ՀՀ դրամ:
«Այսպես, համաքաղաքային միջոցառումների կազմակերպման, ապրանքների գնման, ինչպես նաև ծառայությունների մատուցման համար գումարները տրամադրվել են հիմնականում մեկ ԱՁ-ի, որը, հարկային մարմիններում գրանցված լինելով բոլորովին այլ գործունեության տեսակով, պարզվում է՝ բավական բազմաֆունկցիոնալ է եղել և բոլոր միջոցառումներին ընդառաջ (ենթադրաբար) ձեռք է բերել սնունդ, կենցաղային ապրանքներ, մատուցել ծառայություններ, անգամ քաղաքապետարանի համար ձեռք բերել ոսկյա մատանիներ՝ Տյառնընդառաջի տոնին նորապսակներին նվիրելու համար։
Հարց է առաջանում՝ ինչո՞ւ ամեն ապրանքի կամ ծառայության համար չդիմել մասնագիտացված կազմակերպության և նրանից ուղղակի ձեռք չբերել ապրանք կամ չստանալ ծառայություն, այլ օգտվել ինչ-որ միջնորդ ԱՁ-ից, որը այլ գործունեության տեսակով է գրանցված հարկային մարմիններում և շատ մեծ հավանականությամբ, ժողովրդական լեզվով ասած, փայ է մտել իր միջնորդական առաքելության արդյունքում»,-նշել է Դիանա Գասպարյանը:
Նա տեղեկացրել է, որ ծախսերի նշված հատվածում իրենցից հետաքրքրություն են ներկայացնում նաև հյուրասիրությունները: Դիանա Գասպարյանի խոսքով, այս առումով ռեկորդակիր է 2017 թվականը՝ 10,894,000 ՀՀ դրամ հյուրասիրությունների գումարով։ Ընդ որում, ռեստորաններին միանվագ փոխանցված հյուրասիրությունների գումարները հաճախ զգալի չափերի են, իսկ կից հիմնավորող փաստաթղթերում բացակայում է մասնակիցների քանակի, հյուրասիրության մենյուի և այլնի վերաբերյալ անհրաժեշտ տեղեկատվությունը:
«Համաքաղաքային միջոցառումների համար «ծախսված» գումարները թվում են խիստ կասկածելի, ուռճացված և չհիմնավորված ծախսեր: Վերջում պարզապես մի քանի հետաքրքրական թիվ․ հրավառություններ՝ 9,150,000 ՀՀ դրամի, որից 2014 թվականին՝ 1,550,000 ՀՀ դրամ, 2015 թվականին՝ 1,000,000 ՀՀ դրամ, 2016 թվականին՝ 3,200,000 ՀՀ դրամ և 2017 թվականին՝ 3,400,000 ՀՀ դրամ։ Կրծքանշաններ` 6,544,240 ՀՀ դրամի, որից 5,004,000 ՀՀ դրամը միայն 2015 թվականին։ Ծաղիկների մասին էլ արդեն գիտեք՝ չնայած նախկինում հրապարակված տարեկան 7,200,000 ՀՀ դրամը նշված գումարների մեջ չի մտնում, դա ներառված է «Բարեկարգում» տնօրինության ծախսերում, պարզապես համաքաղաքային միջոցառումների ժամանակ էլ քաղաքապետարանն օգտվել է նույն ԱՁ-ի ծառայություններից։ Դե, փորձեք մարսել այս թվերը՝ առանց հիշելու մանկապարտեզների պատուհաններն ու հնամաշ գույքը»,- նշել է Դիանա Գասպարյանը:
Նա ընդգծել է, որ համաձայն «Տեղական ինքնակառավարման մասին» ՀՀ օրենքի՝ նշված բոլոր գումարները պետք է տրամադրվեին ավագանու որոշումներով, այնինչ քաղաքապետը դրանք տրամադրել է սեփական միանձնյա որոշումներով։
