Հայաստանում 2017-ին առևտուրը գերազանցել է 2016-ի ցուցանիշը
Հայաստանում 2017 թվականին կատարվել է 2.6 տրիլիոն դրամի առևտուր, որը 14 տոկոսով ավելի է 2016 թվականի ցուցանիշից: Ազգային վիճակագրական ծառայության տվյալներով, մանրածախ առևտուրը վերոնշյալի 51.3 տոկոսն է կազմում կամ 1.3 տրիլիոն դրամ և աճել է 5.5 տոկոսով՝ 2016-ի համեմատ:
Մեծածախ առևտրի կշիռը ամբողջի մեջ 44.3 տոկոս է` կազմելով 1.1 տրիլիոն դրամ, աճը նախորդ տարվա համեմատ 25.8 տոկոս է: Ավտոմեքենաների առևտուրը, որն իր մեջ ներառում է ինչպես մասնագիտացված առևտրի կետերի միջոցով իրականացված ավտոմեքենաների, դրանց մասերի և պարագաների վաճառքը, այնպես էլ դրանց տեխնիկական սպասարկումը և նորոգումը, կազմել է 113.7 միլիարդ դրամ` ամբողջի 4.4 տոկոսը, նախորդ տարվա համեմատ այս ոլորտում առևտրի աճը 15 տոկոս է:
Մանրածախ առևտրի շրջանառության աճին նպաստել են խանութներում (8 տոկոս), գյուղատնտեսական արտադրանքի շուկաներում (6.1), առևտրի այլ օբյեկտներում (2.1) մանրածախ առևտրի աճը, զսպող դեր են ունեցել սպառողական ապրանքների շուկաներում (-16.8) և կրպակներում գրանցված (-1.2) առևտրի նվազումը:
Մանրածախ առևտրի շրջանառության կառուցվածքում 2017-ին առյուծի բաժինը խանութներինն է` ամբողջի 79.1 տոկոսը, առևտրի այլ օբյեկտները 11.5 տոկոս են կազմում, սպառողական ապրանքների շուկան` 5.2 տոկոս, կրպակները` 2.1 տոկոս, գյուղատնտեսական արտադրանքի շուկաները` 1.5 տոկոս:
Մանրածախ առևտրի շրջանառության բաշխվածությունն ըստ մայրաքաղաքի և մարզերի ունի հետևյալ տեսքը: Երևանին բաժին է հասնում 74.5 տոկոսը, բոլորը մարզերը միասին վերցրած` 35.5 տոկոս: Կոտայքը, Շիրակը, Արարատն ու Արմավիրը համապատասխանաբար ունեն 4.6, 4.1, 3.3 և 3.1 տոկոս կշիռ այդ բաշխվածության մեջ: Ամենափոքր մասնաբաժինը մանրածախ առևտրի կառուցվածքում ունեն Վայոց ձորն (0.5 տոկոս) ու Սյունիքը (1.6):
