«Հոգնած, կյանքից հաճույք չստացող մարդը կորած մարդ է». հանճարեղ ֆիզիկոս

«Հոգնած, կյանքից հաճույք չստացող մարդը կորած մարդ է». հանճարեղ ֆիզիկոս

Լև Լանդաու. հանճարեղ ֆիզիկոս, ակադեմիկոս, Նոբելյան մրցանակի դափնեկիր, տեսական ֆիզիկայի գիտական դպրոցի հիմնադիր: Իր հանճարեղագույն նվաճումը համարում էր «երջանկության բանաձևի» դուրսբերումը: Թվում է, թե հանճարեղ ֆիզիկոսի համար տարօրինակ թեմա է, սակայն Լանդաուն այդպես չէր համարում և դրան շատ լրջորեն էր վերաբերվում:

Լանդաուի «երջանկության բանաձևը» բաղկացած է 3 պարտադիր տարրերից: Նրա կարծիքով՝ յուրաքանչյուր մարդու երջանկության համար հարկավոր են հավասար չափաբաժիններով հետևյալ բաղադրամասերը՝ աշխատանք, սեր, մարդկանց հետ շփում:

Աշխատանքը նա դրել էր առաջին տեղում: Նա համարում էր, որ աշխատանքը մարդու կյանքում գլխավոր բանն է, և դա այնքան ակնհայտ է, որ ապացուցման կարիք չունի: Լանդաուն գրում էր, որ հենց մարդը դադարի աշխատել, ձեր մարմնին պոչ կաճի ու դուք կսկսեք ծառ բարձրանալ:

Սիրո վերաբերյալ Լանդաուն շատ լուրջ վերաբերմունք ուներ: Նա իրականում վստահ էր, որ ամենաերջանիկ մարդիկ իրենց ժամանակի 30%-ը նվիրում են սիրուն: Օրինակ, յուրաքանչյուրը պետք է ձգտի երջանիկ դարձնել իր մտերիմներին:
Իր կնոջը Լանդաուն ասում էր. ‹‹Իմ առաջնային պարտականությունը քեզ երջանիկ դարձնելն էր: Ամուսինը չի կարող երջանիկ լինել, եթե իր կինը դժբախտ է››: Մարդկանց հետ շփմանը Լանդաուի մոտ ավելի շատ ժամանակ էր հատկացված, քան նախատեսված էր նրա բանաձևով: Այդ կետը կատարված և գերակատարված էր:

Լանդաուն շատ ընկերներ և ծանոթներ ուներ, նրա տան դռները երբեք, անգամ երեկոները չէին փակվում. մեկը գնում էր, մյուսը՝ գալիս, հնչում էին կատակներ, ծիծախ, ուրախ էր ու աղմկոտ: Նրա կյանքը շատ բուռն էր ընթանում, ոչ մի ակադեմիական մեկուսացում աշխարհից նրա պարագայում չէր նկատվում: Նա փակ կյանք չէր վարում՝ չհաշված օրվա առաջին կեսը, երբ նա աշխատում էր: Եվ այսպես՝

1. Ավելի լավ է երջանիկ ձևանալ, քան անկեղծորեն ինքդ քեզ դժբախտ համարել:

2. Մարդը պարտավոր է երջանկության ձգտել և ոչ մի պայմանում չպետք է հրաժարվի դրան հասնելուց:

3. Հոգնած, կյանքից հաճույք չստացող մարդը կորած մարդ է: Ձանձրույթը, անտարբերությունը ճահճի պես ներքև են քաշում, փոխանակ սեփական կյանքի հանգամանքները փորձել հասկանալ, որոշ մարդիկ չեն ցանկանում դրանց մասին մտածել և տրվում են ձանձրույթին:

4. Շատերն իրենցից վանում են անդուր մտքերը: Նրանք անգամ ինչ-որ բան կարգին մտածել ու վերլուծել չեն կարողանում: Սեփական կյանքի համգամանքները հասկանալն ամեն մարդու տրված չէ:

Այստեղ գլխավորը վերլուծելու կարողություն ու սովորություն զարգացնելն է, հասնել այն բանի նախապատճառը բացահայտելուն, թե ինչն է քեզ խանգարում երջանիկ լինել ու վայելել կյանքը: Նա, ով կսովորի դա անել, հեշտությամբ կարող է որոշումներ կայացնել ու հեշտ ապրել:

5. Անհաջողակի, տառապյալի դերը և ընդհանրապես որևէ ձանձրույթ ինձ ձեռք չեն տալիս: Ես այլ պլաններ ունեմ:

6. Մարդիկ համառորեն չեն ուզում հասկանալ, որ երջանկությունը մեր ներսում է: Բոլորը սիրում են այն բարդացնել, իսկ ես, ընդհակառակը, միշտ պարզության եմ ձգտում: Չի կարելի «բարդ է» և «խրթին է» հասկացությունները խառնել: Պետք է սովորել մտածել, ավելին, կառավարել սեփական մտքերը: Այդ ժամանակ դատարկ, անիմաստ վախեր ու տագնապներ չեն լինի:

7. Գլխավորը ամեն բան հաճույքով անելն է: Սա շատ է զարդարում կյանքը:

8. Ամենասարսափելի մեղքը ձանձրանալն է: Ահա կգա Ահեղ դատաստանի օրը, մեր տեր Աստվածը մեզ կկանչի իր մոտ ու կհարցնի. ‹‹Ինչո՞ւ չես վայելել կյանքի ողջ բարիքները: Ինչո՞ւ ես ձանձրացել››:

9. Յուրաքանչյուր մարդ բավականին ուժ ունի կյանքն արժանավայել ապրելու համար: Իսկ բոլոր խոսակցություններն այն մասին, թե որքան դժվարին ժամանակներ են հիմա, սեփական անգործությունն ու զանազան ձանձրույթներն արդարացնելու խորամանկ եղանակներ են:

10. Չէ՞ որ մենք ապրում ենք միայն մեկ անգամ, այն էլ՝ այնքան քիչ, ու ուրիշ կյանք այլևս չի լինելու: Պետք է որսալ յուրաքանչյուր պահը, յուրաքանչյուր հնարավորությունը սեփական կյանքը վառ ու հետաքրքիր դարձնելու համար:

Նյութը հրապարակման պատրաստեց Սոֆա Պետրոսյանը

Գովազդ
Լրահոս
Ամենաընթերցված
ՕրվաՇաբաթվաԱմսվա
2017-11-28
Ի՞նչ կտա Հայաստանի սովորական քաղաքացիներին ՀՀ-ԵՄ համաձայնագիրը
Հայաստանում Եվրոպական միության պատվիրակության ղեկավար, Արտակարգ և լիազոր դեսպան Պյոտր Սվիտալսկին երեկ լրագրողների հետ հանդիպման ընթացքում խոսեց Հայաստան-Եվրոպական միություն նոր համաձայնագրի մասին։