«Երևանը չի կարող դառնալ Հայաստանի միակ ուղեղային կենտրոնը. մարզերն են մեր երկրի հենարանը». Դավիթ Հարությունյան
ՀՀ արդարադատության նախարար Դավիթ Հարությունյանն այսօր «Կառուցողական երկխոսության հանձնառություն» ծրագրի պաշտոնական բացման արարողության ժամանակ իր ելույթում շեշտեց, որ միջոցառմանը մասնակցում է ՀՀ վարչապետի հանձնարարությամբ.
«Երբ մենք խոսում ենք երկխոսության մասին, մյուս կողմը՝ կառավարությունը, պետք է իր դիրքորոշումն արտահայտի, և ես այստեղ եմ, որ ասեմ՝ մենք պատրաստ ենք ամբողջովին, խորապես և անկեղծ համագործակցելու։ Ես հայտնում եմ վարչապետի խոսքը՝ ողջ կառավարության անունից»։
Ըստ Հարությունյանի՝ կառավարությունն է քաղաքականության մշակման հիմնական պատասխանատուն, ինչպես նաև՝ դրա իրագործման պատասխանատուն․ «Սակայն, երբ մենք խոսում ենք պատասխանատվության մասին, պետք է հստակ գիտակցենք, որ պատասխանատվությունն ամենևին չի նշանակում՝ մեկուսացում։ Կառավարման համակարգի արդյունավետությունը կարող է բարձրանալ միմիայն այն դեպքում, երբ հասարակությունը կառուցված է ակտիվ քաղաքացիներից։ Դա հատկապես կարևորվում է Հայաստանում․մի երկրում, որն այդքան էլ հարուստ չէ բնական ռեսուրսներով, չունի ելք դեպի ծով, և մեր հիմնական ռեսուրսն արժանապատիվ մարդն է։ Այս առումով՝ մեր համատեղ աշխատանքը քաղհասարակության հետ, վստահ եմ, որ պետք է տա իր արդյունքները»։
Հետևաբար, ըստ նախարարի՝ «Կառուցողական երկխոսության հանձնառություն» ծրագիրն առաջին հերթին՝ կարևոր է նրանով, որ զարգանալու են քաղհասարակության կազմակերպությունների կարողությունները՝ մի քանի առումով․ «Խոսքը չի վերաբերում զուտ դժգոհությանը, այլ վերաբերում է փաստերի հիման վրա քաղաքականություն մշակելուն և հասարակական վերահսկողություն իրականացնելուն։ Սա հեշտ կարողություն չէ, շատ ավելի հեշտ է քննադատելը»։
Նրա խոսքով՝ ամենակարևորն իրար հետ աշխատել սովորելն է․
«Կապ չունի՝ քաղհասարակություն և իշխանությո՞ւն, թե՞ հենց քաղհասարակության ներսում. պետք է սովորել միմյանց հետ աշխատել։ Բայց, ցավոք, մենք ունենք շատ լուրջ անհանդուրժողականություն, շատ հաճախ աշխարհը տեսնում ենք միմիայն սև և սպիտակ գույներով։ Ի սկզբանե կառավարությունը ողջունել էր այս ծրագիրը։ Մենք շարունակելու ենք մեր աշխատանքը, և ողջունելի է, որ աշխատանքն ակտիվորեն կազմակերպվելու է նաև մարզերում։ Չի կարող Երևանը դառնալ Հայաստանի միակ և հիմնական ուղեղային կենտրոնը։ Ավելին, քաղաքականության մշակումը զուտ կենտրոնում կարող է քաղաքականությունն ուղղել զուտ կենտրոն։ Մարզերն են մեր երկրի հենարանը, և ես կարծում եմ, որ ծրագիրն այս առումով գնահատելի է»։
