Մոսկվան արդյունավետ բանակցություններ է ակնկալում ԱՄՆ-ի պետքարտուղարի հետ
Մոսկվան արդյունավետ բանակցություններ է ակնկալում ԱՄՆ-ի պետքարտուղար Ռեքս Թիլերսոնի հետ: Դա կարեւոր է ոչ միայն երկկողմ հարաբերությունների, այլեւ համաշխարհային ասպարեզում ընդհանուր մթնոլորտի համար: Այդ մասին Ռուսաստանի ԱԳ նախարարությունում հայտարարել են պետքարտուղարի այցի կապակցությամբ, որը նախատեսված է ապրիլի 11-12ին, տեղեկացնում է ՌԻԱ Նովոստիին:
Դիվանագիտական գերատեսչությունում նշել են, որ բանակցություններում «առաջին հերթին ցանկալի կլիներ հասկանալ, թե ԱՄՆ-ում ընդհանրապես որքանով են գիտակցում երկկողմ հարաբերությունների կայունացման եւ նորմալացման անհրաժեշտությունը»:
Մասնավորապես, Մոսկվան հուսով է, որ Վաշինգտոնը կհամաձայնի սիրիական ԽանՇեյխունում քիմիական զենքի հետ կապված միջադեպի օբյեկտիվ հետաքննությանը: Միջադեպից հետո ԱՄՆ-ը հրթիռային հարվածներ է հասցրել սիրիական բանակի Շայրաթ ավիաբազային:
Ռուսաստանի դիվանագիտական գերատեսչությունում այն կարծիքին են, որ ԱՄՆ-ի այդ գործողություններն ագրեսիայի ակտ են, խախտում են միջազգային իրավունքը եւ նպաստում են ահաբեկիչների ուժեղացմանը:
