«Իսկ միգուցե միակողմանի տարածքնե՞ր տանք, որ շատ ավելի համոզիչ թվանք Բաքվի համար». Արմեն Ռուստամյանը՝ Լևոն Տեր-Պետրոսյանին
Հայ Հեղափոխական Դաշնակցություն կուսակցության պատգամավորության թեկնածու, ԱԺ ՀՅԴ խմբակցության ղեկավար Արմեն Ռուստամյանի մասնակցությամբ այսօր տեղի ունեցավ հարցազրույց-ասուլիս, որի ընթացքում դիտարկումներ և գնահատականներ հնչեցին ավարտին մոտեցած նախընտրական գործընթացի շուրջ:
Ամփոփելով քարզարշավը, Արմեն Ռուստամյանը նկատում է՝ մենք որևէ մեկին որևէ փաստ չենք տվել կարծելու, թե իշխանական լծակներ ենք օգտագործել, ավելին, մենք զերծ ենք մնացել այդ գայթակղությունից՝ օգտագործելու որևէ լծակ:
Անդրադառնալով ավարտվող քարոզարշավի և առաջիկա ընտրությունների որակին՝ բանախոսը նկատում է.
«Այս քարոզարշավի քաղաքական մակարդակը մի քիչ նսեմացված էր, որում իր դերակատարությունն ունեցավ իշխող Հանրապետականը: Հարցը հետևյալն էր՝ ո՞վ է ֆեոդալը տվյալ տարածքում: Դաժան պայքար եղավ, եղան բախումներ, որը ստվեր գցեց ընտրությունների որակի վրա: Այս ամենից հետո դեռ խնդիրներ են առաջանալու նույն այդ ուժի ներսում, երբ կհասնի մանդատները բաժանելու ժամանակը, որովհետև կարող է ստացվել այնպես, որ մանդատ ստանան այնպիսի մարդիկ, ովքեր քիչ են աշխատել: Քանի որ ստացված ձայների 50 տոկոսը գնում է՝ համապետական, հետո միայն՝ ռեյտինգային ցուցակին, որը հնարավորություն է տալու տարածքային բաժանում կատարել: Անարդարություն կա, որը շեղում է մտցնում պրոցեսի մեջ: Առհասարակ ցանկացած շեղում դասական ձևից հանգեցնում է այսպիսի իրավիճակների, որի արդյունքում մենք ունենալու ենք մանդատների անհավասարաչափ բաշխում, այն իմաստով որ դրանց արժեքները տարբեր են լինելու»:
Հանդիպման ընթացքում հնչած այն հարցին, որ վերջին 18-20 տարում Հանրապետական կուսակցությունը տարբեր մոդիֆիկացիաներով եղել է իշխանության, իսկ Դաշնակցությունը՝ պարբերաբար կոալիցիայում, ապա ստեղծված իրավիճակում արդյո՞ք Դաշնակցությունն իրեն մեղավոր զգում է, Արմեն Ռուստամյանը պատասխանում է.
«Դաշնակցությունն այս ողջ ընթացքում հստակ հետևել է իր որդեգրած բոլոր սկզբունքներին: Այս հարցին մենք ունենք հստակ պատասխան՝ որքանով որ իշխանությունները (ունենալով իրական իշխանություն) անսացել են երկրի առջև ծառացած խնդիրների լուծման շուրջ առաջ քաշած առաջարկներին, ապա դրանք իրենց դրական պատասխանները ստացել են, իսկ երբ արժանացել ենք մերժողական պատասխանի կամ դուրս ենք եկել կոալիցիայից, կամ փորձել այլ ճանապարհներով շարունակել մեր պայքարը և մեր մասնակցությամբ իրավիճակները շտկելու ու լուծումներ գտնելու այլ ճանապարհներ ենք փնտրել: Որևէ մեկը չի կարող բերել այնպիսի փաստեր, որ Դաշնակցությունը չի կատարել իր խոստումները, որ տվել է ժողովրդին»:
Բանախոսը նկատում է՝ դատելով քարոզարշավի ընթացքից և ներմուծված ռեյտինգային համակարգից, այնուամենայնիվ, ստեղծված են իրական պայմանները, որպեսզի իշխանափոխություն տեղի ունենա.
«Այս ընտրությունները ցույց կտան, որ մասնակցությունը լինելու է շատ ավելի պակաս, քան նախկին բոլոր ընտրություններում էին, որովհետև արձանագրվելու է ընտրողների իրական մասնակցություն: Մեկ ուրիշի կամ բացակա անձանց փոխարեն՝ քվեարկությունը կամ կրկնաքվեարկությունը բացառվում է: Դրա համար մշակված բոլոր մեխանիզմներն առկա են: Մենք փաստելու ենք, սակայն, որ լինելու են խախտումներ, և կարող ենք նաև ապացուցել, որ դրանք ազդել են ընտրության ընթացքի վրա: Այս ընտրությունների գլխավոր առանձնահատկությունն այն է, որ անտեր ձայն չկա, մեր խնդիրն էր՝ բացատրել ընտրազանգվածին, որ չի կարելի գերդաստանային կապերի միջոցով գնալ ընտրությունների և ապահովել առաջիկա 5 տարիների ձեր ապագան»:
Անդրադառնալով ՀՀ առաջին նախագահ Լևոն Տեր-Պետրոսյանի կողմից առաջարկված՝ ԼՂՀ-ի հիմնախնդրի կարգավորման տարբերակին, Արմեն Ռուստամյանն ասաց.
«Ցանկացած քննարկումների նորմալ եմ վերաբերվում և որևէ խնդիր չեմ տեսնում: Այս ամենի մեջ միակ դրական իրողությունն այն է, որ մենք ողջ աշխարհին ներկայանում ենք՝ որպես քաղաքակիրթ և հանդուրժող հասարակություն ունեցող ժողովուրդ, որտեղ կարող են հնչել նաև այդպիսի տեսակետներ, այսինքն՝ ուղիղ այն թեզերը, որով կարծես տպավորություն է ստեղծվում, թե մեր հակառակորդ, մեզ թշնամի հռչակած երկիրն իր պրոպագանդան է իրականացնում մեր իսկ երկրում, և այն էլ՝ նախընտրական փուլում: Ստացվում է, որ կա մի քաղաքական ուժ, որ մեզ է հրամցնում այն թեզերը, ինչ դուք կլսեք միայն պաշտոնական Բաքվի շուրթերից:
Սա խոսում է մեր հանդուրժողականության մասին, բայց դուք կարո՞ղ եք պատկերացնել մի ուժ, որ Բաքվում Ալիևին համոզի այն, ինչ անում է հիմա այդ ուժը: Եթե նրանց հաջողվի էլ կենդանի մնալ, ապա անպայմանորեն կհայտնվեն բանտերում, չնայած մի քանի քաղբանտարկյալ՝ ավել, մի քանիսը՝ պակաս, Բաքվի համար մեծ նշանակություն չունի: Սա պարզապես կործանարար առաջարկ է՝ նկատի ունելով այն հարևանին, ում հետ մենք պետք է այդ «խաղաղությունն» ունենանք: Բաքուն որևէ փոխզիջում չի պատրաստվում իրականացնել:
Նրանց ամենամեծ զիջումը կլինի Ղարաբաղին ամենաբարձր մակարդակի ինքնավար մարզի կարգավիճակ տալը՝ Ադրբեջանի կազմում: Իսկ միգուցե միակողմանի տարածքնե՞ր տանք, որ շատ ավելի համոզիչ թվանք Բաքվի համար… Էլ չեմ ասում, որ իր այդ տեսակետները հայտնելուց առաջ գուցե այդ մարդը հաշվի՞ նստեր ժողովրդի ցանկության հետ, որը նրա պարագայում երբեք չի եղել: Բա էլ ի՞նչ ժողովրդավարությունից եք խոսում, երբ դուք դուրս եք գալիս ժողովրդի կամքի դեմ: Կամ, եթե Սերժ Սարգսյանը պաշտոնապես դա արդեն իսկ անում է, ապա դու ինչի՞ ես դուրս եկել հրապարակ: Պաշտպանո՞ւմ ես իշխանությունների առաջ քաշած թեզը, ուրեմն դու սուտ ես ասում, թե միայն այդ հարցում ես իշխանությանը պաշտպանում, պաշտպանում ես բոլոր հարցերում»:
Անդրադառնալով ՀՀ առաջին նախագահի վերջին հրապարակային ելույթում Դաշնակցական կուսակցության հասցեին հնչեցրած ծաղրական բնորոշումներին՝ Արմեն Ռուստամյանը նկատում է.
«Դաշնակցությանը պետք չէ ամբիոններով վախեցնել: Ինչ վերաբերում է »ոչ մի թիզ հող»-ին, ապա պատերազմը վերջանալու երկու տարբերակ ունի՝ կամ մենք հաղթում եք, կամ պարտվում: Ինքը մեզ ասում է՝ եկեք պարտվենք: Թող այդ մարդը բացատրի, թե ինչո՞ւ ինքը շեղվեց այն գաղափարից, որով ինքը եկավ իշխանության: Իսկ եթե ինքը Հայ Դատը չի ընդունում, ապա նշանակում է՝ արդարությունը չի ընդունում՝ ո՛չ պատմական արդարությունը, ո՛չ ժամանակակից: Ինքն արդարության գաղափարի դեմ է ու եկել է, մեզ դա՞ս է տալիս: Դուք ցանկացած ամբիոններում ճիշտ թեզեր պաշտպանեք և կտեսնեք՝ ո՞վ կկտրի ձեր ձայնը որևէ ամբիոնից: Ի վերջո, այնպիսի բաներ չի կարելի ասել, որ քեզ արդեն իսկ կդարձնի ոչ բանակցային կողմ»:
«Արդյո՞ք Մադրիդյան սկզբունքներն առաջարկում է հանձնվել» հարցին Արմեն Ռուստամյանը պատասխանեց.
«Ի տարբերություն Լևոն Տեր Պետրոսյանի Ղարաբաղյան հակամարտության լուծման ժամանակի առաջ քաշած տեսության՝ Մադրիդյան սկզբունքների պրոցեսի մեջ մի կարևոր հարց կա՝ կարգավիճակի լուծման տարբերակ, որի մասին այդ մարդը, չգիտես ինչու, չի բարձրաձայնում: Մադրիդյան սկզբուների մեջ կարգավիճակի հարցը կա, հասկացեք, տարածքներ՝ կարգավիճակի դիմաց, սակայն սկզբում՝ կարգավիճակ լուծման հարց, հետո՝ տարածքների խնդիր: Սերժ Սարգսյանն ասում է՝ ստատուս-քվոն կարող է փոխվել, եթե լուծվի Ղարաբաղի կարգավիճակի հարցը: Ադրբեջանը երբեք դա չի անելու, ու այսպիսով մենք հարվածները տեղափոխում ենք Ադրբեջանի կողմ»:
