Բաժիններ՝

«Դա շատ յուրահատուկ լանջ է, որտեղից տեսարան է բացվում դեպի Արարատ լեռը և Երևանյան լիճը»

ՀՀ կառավարությանն առընթեր քաղաքաշինության պետական կոմիտեի միջազգային համագործակցության և կառուցապատման ներդրումային ծրագրերի վարչության կողմից մշակվել ու կառավարությանն է ներկայացվել «Նոյ ազգագրական թաղամասի» կառուցապատման ներդրումային ծրագիրը։ «Արմենպրես»-ի հետ զրույցում նախագիծը ներկայացրեց ճարտարապետ Արտավազդ Թարխանյանը։

Պարոն Թարխանյան, որտե՞ղ է գտնվելու թաղամասը:

– Այն գտնվելու է «Դալմա Գարդեն Մոլ» առևտրի կենտրոնին և Դալմայի այգիներին հարող տարածքում։ Դա շատ յուրահատուկ լանջ է, որտեղից տեսարան է բացվում դեպի Արարատ լեռը և Երևանյան լիճը։ Հենց դրանով էլ կապ է ստեղծվում բիբլիական առասպելի և թաղամասի միջև։

Որքա՞ն է լինելու կառուցապատման մակերեսը։ 

– Ծրագրի շրջանակում նախատեսվում է կառուցապատել մոտ 9,2 հա մակերեսով հողատարածք։ Շուրջ 150 000 քմ կառուցապատմամբ մի թաղամաս է լինելու, որտեղ տարբեր հատվածներում կկառուցվեն Հայաստանի տարբեր տարածքներին բնորոշ ժողովրդական տներ։

Ինչպիսի՞ շինություններ են լինելու այդ թաղամասում։ 

– Լինելու են երկու և երեքհարկանի շինություններ, որոնք կունենան տարբեր ճարտարապետական ոճեր՝  Արևմտյան Հայաստանից, Արևելյան Հայաստանից։ Խոսքը ոչ թե հասարակական շինությունների մասին է, այլ ժողովրդական, այսինքն՝ սեփական առանձնատների և այն բնակելի կառույցների մասին։ Թաղամասի հատակագծային լուծման մեջ որպես հիմք է ընդունված դեռ միջնադարից մեզ հայտնի Անի քաղաքի թաղամասերից մեկի հատակագիծը։ Նախատեսվում է այսպիսի ինքնատիպ միջավայրում կառուցել փոքր-ինչ թեք փողոցներ, գողտրիկ անկյուններ, ինչով հնարավորություն կստեղծվի մի փոքր այլ կերպ ներկայացնել ժողովրդական մշակույթը։

Ինչպիսի՞ աշխատանքներ են նախատեսվում ցուցադրել։ 

– Գորգագործություն, կարպետագործություն, քանդակագործություն, նկարչություն, կավագործություն և բոլոր այն արվեստներն ու արհեստները, ինչով հարուստ է մեր երկիրը և հայ ժողովրդական ժառանգությունը։ Լինելու են նաև ցուցասրահներ, վաճառասրահներ նույն այդ վարպետների աշխատանքների համար։ Որպեսզի թաղամասը չլինի ինչ-որ մի աշխատավայր, որտեղ մարդիկ գալիս են ուղղակի մեկ նպատակով, մտադիր ենք ժողովրդական վարպետներին տրամադրել որոշ բնակելի հատվածներ, որպեսզի բոլոր այդ արհեստագործները կարողանան ապրել։ Գուցե շենքերի առաջին հարկերում լինեն ցուցասրահները, երկրորդում՝ արվեստանոցները և երրորդ հարկերում՝ նրանց բնակարանները։ Այս ամենը կհանգեցնի նրան, որ  թաղամասը կդառնա նաև «կենդանի մարմին»։

Ի՞նչ միտում ունի այս ծրագիրը։ 

– Ամբողջ ծրագիրը միտված է ևս մեկ զարկ հաղորդելու Հայաստանում մշակութային զբոսաշրջությանը։ Սա կարող է օրինակ ծառայել այն զբոսաշրջիկների համար, ովքեր կարճ ժամանակով են գալիս մեր երկիր։ Այսինքն՝ այստեղ կարող են տպավորություն ստանալ այն իսկականից, ինչը ներկայացված է Տավուշի, Սյունիքի և այլ մարզերում։ Տուրիստական հոսքերը մեր ծրագրի շնորհիվ կարող են ավելանալ, և այստեղ բոլոր այցելուները կարող են ծանոթանալ Հայաստանի ժողովրդի մշակույթին։ Մտադրություն կա, որպեսզի լինեն նաև տաղավարներ, որտեղ կցուցադրվեն Հայաստանի մի շարք շրջանների խոհանոցներ։

Ի՞նչ հեռավորությամբ է թաղամասը գտնվում Երևանի կենտրոնից։ 

– Երևանի Հանրապետության հրապարակից և «Զվարթնոց» օդանավակայանից գտնվում է մեքենայով 10 րոպե ընթացքի հեռավորությամբ։ Գտնվում է տարանցիկ մի հատվածում, որը հասանելի է տարբեր տուրիստական հոսքերի տեղաշարժի համար։ Որպեսզի զբոսաշրջիկը Հայաստանից մեկնելու վերջին պահին ևս կարողանա ինչ-որ բանի հետ ծանոթանալ։ Հնարավոր է, դա էլ առիթ հանդիսանա, որ նա հաջորդ անգամ այցելի Հայաստան, արդեն ավելի մանրամասն ուսումնասիրի տվյալ շրջանը կամ շրջանները։

Դեպի ազգագրական թաղամաս կառուցվելո՞ւ են, արդյոք, նոր փողոցներ։ 

– Իհարկե, լինելու են նաև նոր փողոցներ։ Օրինակ՝ դեպի «Դալմա Գարդեն մոլ» առևտրի կենտրոնի ավտոկայանատեղի տանող ճանապարհը նախատեսվում է երկարացնել և հասցնել մինչև այդ թաղամասը։ Թաղամասն էլ իր հերթին կունենա սեփական ավտոկայանատեղի 750 կամ ավելի ավտոմեքենայի համար։ Հնարավորություն կա նաև կապ ստեղծել Մոնթե Մելքոնյան պողոտայի հետ։

Ովքե՞ր են ներդրողները և մոտավորապես որքա՞ն է արժենալու այս նախագիծը։ 

– Ներկա պահին մենք մշակել ենք այս ներդրումային ծրագիրը և նոր ենք ներկայացնում հանրությանը, հենց այն նպատակով, որպեսզի ներդրողներ ներգրավենք։ Դեռ այս ծրագրի շրջանակում ներդրողներ չկան, որովհետև մոտ 2 ամիս առաջ է ներկայացվել։ Ընդհանուր ծավալը կազմում է շուրջ 98 մլն դոլար։ Այժմ բանակցություններ են տարվում հնարավոր ներդրողների հետ։

Հարցազրույցը՝ Լիլիթ Դեմուրյանի

Բաժիններ՝

Տեսանյութեր

Լրահոս