Բաժիններ՝

ՀՀ վարչապետը, ԱԺ նախագահը, պաշտպանության և սփյուռքի նախարարները ելույթ են ունեցել դեսպանահավաքին

Երևանում մարտի 3­-ին շարունակվել են Հայաստանի ԱԳՆ ղեկավար կազմի, արտերկրում Հայաստանի դեսպանների, միջազգային կազմակերպություններում մշտական ներկայացուցիչների և գլխավոր հյուպատոսների հավաքի աշխատանքները: Այս մասին տեղեկացրին ՀՀ կառավարության տեղեկատվության և հասարակայնության հետ կապերի վարչությունից` հավելելով. «Դեսպանահավաքի մասնակիցների առջև ելույթ ունեցավ Հայաստանի ԱԺ նախագահ Գալուստ Սահակյանը, ով ներկայացրեց միջխորհրդարանական փոխգործակցության զարգացման ուղղությամբ ձեռնարկվող քայլերը: Դիվանագետի օրվա առթիվ՝ միջխորհրդարանական կառույցներում խորհրդարանական պատվիրակությունների հետ սերտ համագործակցության, համատեղ նախաձեռնությունների և ցուցաբերած դիվանագիտական աջակցության համար Ազգային ժողովի նախագահը ԱԺ պարգևներ հանձնեց ԱԳՆ մի շարք աշխատակիցների։

Հայաստանի վարչապետ Կարեն Կարապետյանն իր ելույթում ներկայացրեց կառավարության նախաձեռնած բարեփոխումները և ներդրումների խրախուսմանն ուղղված քայլերը՝ այդ գործում կարևորելով արտաքին գործերի նախարարության համակարգի դերակատարությունը: Վարչապետի ելույթից հետո հանգամանալից մտքերի փոխանակում ծավալվեց՝ արտաքին քաղաքական օրակարգի տնտեսական բաղադրիչի ընդլայնման շուրջ:

Դեսպանահավաքին ելույթ ունեցավ նաև պաշտպանության նախարար Վիգեն Սարգսյանը։ Նախարարը ներկայացրեց պաշտպանական ոլորտում բարեփոխումները, բանակաշինության բնագավառում նոր նախաձեռնությունները, Հայաստանի անվտանգության ապահովման մակարդակի բարձրացման, ռազմական կրթության բարելավման, այլ երկրների հետ ռազմատեխնիկական համագործակցության զարգացման ուղղությամբ ձեռնարկվող քայլերը, պատասխանեց բազմաթիվ հարցերի:

Սփյուռքի նախարար Հրանուշ Հակոբյանը դեսպանահավաքի մասնակիցներին ներկայացրեց սփյուռքի հետ հարաբերությունների ամրապնդման հարցում ձեռնարկվող քայլերը, Սիրիայից Հայաստան տեղափոխված հայերին աջակցության ապահովման ուղղությամբ կատարվող աշխատանքները, սփյուռքի նախարարության նախաձեռնությունները:

Դեսպանահավաքի մասնակիցներն այցելեցին Ծիծեռնակաբերդ և հարգանքի տուրք մատուցեցին Հայոց ցեղասպանության զոհերի հիշատակին։

Բաժիններ՝

Տեսանյութեր

Լրահոս