«Նախագահը բրյուսելյան այցի ընթացքում կոշտ դիրքորոշում ցուցաբերեց». Կարեն Բեքարյան
Նախագահ Սերժ Սարգսյանն իր բոլոր բրյուսելյան հանդիպումներում և հարցազրույցներում արցախյան հիմնահարցի վերաբերյալ ցուցաբերել է հստակ և կոշտ դիրքորոշում: Այսօր լրագրողների հետ հանդիպման ժամանակ ասաց «Եվրոպական ինտեգրացիա» կազմակերպության ղեկավար, ՀՀ ԱԺ պատգամավոր Կարեն Բեքարյանը:
«Դա արված էր Հայաստանի դիրքորոշումը ավելի ընկալելի և ընդգծված դարձնելու միջազգային հանրությանը: Նախագահ Սերժ Սարգսյանը հստակ ներկայացրեց արցախյան հիմնախնդրի խաղաղ կարգավորման բոլոր խոչընդոտները»,- ասաց Բեքարյանը:
Ըստ պատգամավորի` այցելության շրջանակում անդրադարձ եղավ ապրիլյան պատերազմին և այն նախադրյալներին, որոնք հնարավոր դարձրեցին պատերազմը:
«Այն ժամանակ միջազգային հանրությունը կոշտ չարձագանքեց և կանխարգելիչ դերակատարություն չստանձնեց, ինչի հետևանքով ներկայումս շարունակվում են սրացումները շփման գծում: Այսինքն` միջազգային հանրության միասնական արձագանք չտալու դեպքում լարված իրավիճակից անցում չի լինի խաղաղ փուլ»,- նշեց Բեքարյանը:
Բեքարյանի խոսքով` նախագահը արձագանքեց նաև Ադրբեջանի կողմից մշտապես շահարկվող այն թեզին, թե իբր հայկական կողմը փորձում է միայն կառչել ստատուս-քվոյից:
«Նախագահի կողմից տրվեց բավականին լայնածավալ և բովանդակային պատասխան այս թեզին՝ կապելով երկու հիմնական դրույթների հետ: Առաջինը այն, որ իրավիճակի սրացման և սահմաններում մարդկային զոհերի ու վիրավորումների դեպքում քաղաքակիրթ բանակցություն վարելը և խաղաղ կարգավորման գործընթացը տվյալ պարագայում բնական չէ: Նախագահը շատ հստակ նշեց, որ Ադրբեջանի էսկալացիոն քաղաքականությունը և ներկա սրացումները հետ են մղում քաղաքական բանակցային գործընթաց կոչվածը»,- նշեց Բեքարյանը:
Նա նաև նշեց, որ եթե Ադրբեջանը ցանկություն ունի փոխել ստատուս-քվոն, դրա հնարավոր տարբերակն Արցախի Հանրապետության անկախության ճանաչումն է:
«Ադրբեջանի պատրանքները, շփման գծում սրացումների և հումանիտար աղետների միջոցով հայկական կողմից և միջազգային հանրությունից դիվիդենտներ քաղելու առումով, չեն աշխատում: Այս համատեքստում նախագահի հանդիպումներից երկուսի ժամանակ հնչեցին մեսիջներ, որ Արցախի Հանրապետության բնակչության անվտանգությունը պահելու համար Հայաստանի Հանրապետությունը չի խորշելու օգտագործել իր ողջ զինանոցը: Այս հստակեցումները կարևոր էր հղել ոչ միայն եվրոպական գործընկերներին, եվրոպական հանրությանը, այլև Ադրբեջանին և ԵԱՀԿ մինսկի խմբի համանախագահ ող երկրներին»,- շեշտեց Բեքարյանը:
Հիշեցնենք, որ Սերժ Սարգսյանը փետրվարի 26-28-ը աշխատանքային այցով Բելգիայի մայրաքաղաք Բրյուսելում հանդիպումներ է ունեցել ԵՄ կառույցների ղեկավարների, այդ թվում՝ Եվրոպական խորհրդի նախագահ Դոնալդ Տուսկի, Եվրոպական հանձնաժողովի նախագահ Ժան-Կլոդ Յունկերի, Եվրոպական միության արտաքին քաղաքականության և անվտանգության հարցերով բարձր ներկայացուցիչ, Եվրոպական հանձնաժողովի փոխնախագահ Ֆեդերիկա Մոգերինիի եւ այլոց հետ, քննարկել ԵՄ-Հայաստան հարաբերություններին, ինչպես նաեւ արցախյան հիմնահարցին առնչվող հարցեր:
