Հայ և ռուս իրավապահները կարևորել են կոռուպցիայի դեմ պայքարում փորձի փոխանակումը
Եռօրյա այցով Հայաստանում է Ռուսաստանի Դաշնության ներքին գործերի նախարարության անձնական անվտանգության գլխավոր վարչության պատվիրակությունը: Ինչպես տեղեկացրին ՀՀ ոստիկանության լրատվական ծառայությունից, հյուրերին ընդունել է ՀՀ ոստիկանության ներքին անվտանգության վարչության պետ Արմեն Հակոբյանը:
Ռուս գործընկերների հայաստանյան այցի նպատակը կոռուպցիայի դեմ պայքարի, ոստիկանության ծառայողների իրավախախտումների նախականխման, ինչպես և ոստիկանության ծառայողների ու նրանց ընտանիքների անդամների պետական պաշտպանության միջոցների ապահովման շրջանակներում փորձի փոխանակումն է: Հանդիպման ընթացքում կողմերը քննարկել են երկու երկրների վերոհիշյալ ծառայությունների գործունեությանը վերաբերող, ինչպես և փոխադարձ հետաքրքրություն ներկայացնող մի շարք հարցեր:
Փաստել են, որ նման հանդիպումները դրական են անդրադառնում ներքին անվտանգության ապահովման ոլորտում երկու երկրների իրավապահ կառույցների համագործակցության զարգացմանը, ինչն իր հերթին բարձրացնում է այդ ծառայությունների գործունեության արդյունավետությունը: Հանդիպման ավարտին ռուս գործընկերները շնորհակալություն են հայտնել ջերմ ընդունելության համար:
