Ֆիզուլիի զորամասում ապրիլյան պատերազմի ժամանակ նույն տանկում զոհված 3 զինծառայողների հիշատակին խաչքար և ցայտաղբյուր է տեղադրվել
Ի հիշատակ ապրիլյան քառօրյա պատերազմում հերոսաբար զոհված գյումրեցի Տիգրան Աբգարյանի, Բենիամին Եղոյանի և դիլիջանցի Վլադիմիր Ալիխանյանի ՝ Ֆիզուլիի զորամասում, որտեղ ծառայել են տղաները, տեղադրվել է խաչքար և ցայտաղբյուր:
168.am-ի հետ զրույցում Տիգրան Աբգարյանի եղբայր Ժորա Աբգարյանն ասաց, որ խաչքարը նվիրել է քանդակագործ Անդրանիկ Խաբլարյանը, իսկ ցայտաղբյուրի տեղադրման աշխատանքներով զբաղվել են երեք զինվորների ընտանիքները, իսկ հրամանատարությունը զբաղվել է տարածքի մաքրման և կառուցապատման աշխատանքներով:
Նրա փոխանցմամբ՝ օրերս տեղադրված խաչքարի բացման և օծման հանդիսավոր արարողությանը ներկա են եղել հայրենիքի համար զոհված երեք զինվորների հարազատները, հոգևորականներ, բարձրաստիճան այրեր:
Հիշեցնենք, որ Արցախում հերոսաբար զոհված Տիգրան Աբգարյանը, Բենիամին Եղոյանն ու Վլադիմիր Ալիխանյանը Ջեբրաիլի հատվածում պայքար էին մղել թշնամու 8 տանկերի դեմ՝ խոցելով 3-ը, և նահատակվել:
