«Մեր պետության մեջ ինչ անում ենք, կա՛մ ասում են՝ նախընտրական է, կա՛մ՝ հետընտրական». Սուքիաս Ավետիսյան
«Մեր պետության մեջ ինչ անում ենք, կա՛մ ասում են՝ նախընտրական է, կա՛մ՝ հետընտրական է։ Եկեք մի քիչ այդ ընտրություններից հեռու մնանք, կոնկրետ գործերով զբաղվենք և խոսենք կոնկրետ գործերից։ Այս առումով ո՛չ արագաչափերի, ո՛չ կարմիր գծերի թեման նոր չէ։ Դուք գիտեք՝ վերջին երեք տարում այդ թեման անընդհատ տարբեր առիթներով և՛ Ազգային ժողովում է բարձրացվել, և՛ Ազգային ժողովում քննարկումներ են եղել, բայց, այո՛, իր վերջնական հանգուցալուծումը չի ստացել»,- այս մասին այսօր լրագրողների հետ հանդիպման ընթացքում ասաց ԱԺ ՀՀԿ խմբակցության պատգամավոր Սուքիաս Ավետիսյանը՝ անդրադառնալով նախագահ Սերժ Սարգսյանի հանձնարարականին:
Հիշեցնենք, որ Սերժ Սարգսյանը խորհրդակցություն էր անցկացրել, որտեղ համապատասխան գերատեսչությունների ղեկավարներին հանձնարարել էր «Սեքյուրիթի դրիմ» ՍՊԸ-ի և «Փարկինգ Սիթի Սերվիսի» ու «Լոկատոր» ՓԲԸ-ի կոնսորցիումի հետ բանակցությունների արդյունքում 10-օրյա ժամկետում համապատասխան իրավական մեխանիզմներ մշակել, որպեսզի սեփականության ձևով պայմանավորված նրանց գործառույթները, այդ թվում՝ ֆինանսական հոսքերի տնօրինումն ու կառավարումը, անցնեն պետական և համայնքային կառույցներին:
Սուքիաս Ավետիսյանի խոսքով՝ բանկերի, Դատական ակտերի հարկադիր կատարման ծառայության, նախարարության հետ բազմաթիվ քննարկումներ են տեղի ունեցել տարբեր հարցերի առնչությամբ։ Ի վերջո, ՀՀ նախագահ Սերժ Սարգսյանը խորհրդակցություն հրավիրեց, տվեց հստակ հանձնարարականներ. այժմ համապատասխան մարմինները զբաղվում են հանձնարարականներով։ «Եթե մենք մի կողմից ասում ենք, որ պետք է ամեն ինչ անենք, որ մարդիկ գան, գումար դնեն, աշխատատեղ ստեղծեն, բիզնես ստեղծեն, ապա մենք, այնպես չէ, որ հիմա պետք է այնպիսի քայլի գնանք, որ հետո էլ ասեն, թե՝ գիտենք՝ մի կողմից ասում եք՝ եկեք, բիզնես դրեք, մյուս կողմից՝ բիզնեսը վերցնում եք։ Սա պետք է լինի հստակ, չափի մեջ, և նախագահի հանձնարարականն էլ հենց այդպիսին էր՝ առանց սեփականատիրոջ իրավունքները խախտելու փորձենք գտնել լուծումներ։ Լուծումը հստակ է՝ կարելի է շատ հստակ հաշվարկել, թե որքան գումար են ներդրել համապատասխան երեք կազմակերպությունները, այդ ներդրված գումարի պայմաններում անցած տարիների ընթացքում՝ գործունեությունը սկսելուց մինչև օրս, որքան գումար է հավաքագրվել, որքան գումար է գնացել պետական կամ համայնքային բյուջե, որքան է մնացել իրենց։ Այդ պարագայում՝ հաշվարկները կատարելուց հետո, կարելի է շատ հստակ գտնել լուծումները»,- ասաց նա։
Ըստ Սուքիաս Ավետիսյանի՝ որքան էլ բողոքենք, արագաչափերը ներդնելուց հետո երթևեկությունը, միանշանակ, կարգավորվել է, հատկապես՝ Երևանում, իսկ Երևանում վճարովի ավտոկայանատեղիների ներդրումից հետո որոշակիորեն հստակեցվել է կայանատեղերի խնդիրը։
ԱԺ ԲՀԿ խմբակցության պատգամավոր Լյովա Խաչատրյանն էլ այս առնչությամբ ասաց. «Կարծում եմ՝ երևույթը շատ աննորմալ էր։ Մենք շատ ենք խոսել այդ մասին։ Սա բիզնես կարելի է համարել միայն մեծ ցանկության դեպքում։ Սա ուղղակի քվոտավորված, մեղմ ասած՝ ռեկետ էր, որն իրականացվում էր։ Շատ երկրներում, իհարկե, կան նման կայանատեղեր, իհարկե, կան արագաչափեր, և այլն, բայց դրանց գումարը գնում է պետական ֆոնդ, ծառայում է ժողովրդին՝ վերականգնելու նույն ճանապարհները, որ շահագործվել են։ Մեզ մոտ դա չկար, պարզապես մարդկանց գրպանն էր մտնում։ Իհարկե, ողջունում ենք, ինչպես ասում են՝ լավ է ուշ, քան երբեք։ Կարծես թե ցանկություն կա որոշակի նորմալ իրավիճակի բերելու դրանից հավաքված գումարները։ Իհարկե, դեռ խնդիրներ կան, դեռ ամբողջական պարզ չէ՝ ինչպես է դա լինելու։ Նման ցանկացած բիզնեսում հնարավոր է այնպիսի ծախսեր ցույց տալ, որ եկամուտն էլ լինի սիմվոլիկ։ Կապրենք՝ կտեսնենք։ Եթե լինի այնպես, ինչպես նորմալ երկրներում է (ծախսերը համապատասխանում են իրականությանը, եկամուտն ամբողջությամբ ցույց է տրվում, և այդ ամբողջը գնում է համայնքային բյուջե, վերադարձվում է ճանապարհները վերանորոգելու համար), մենք կողջունենք։ Առայժմ միայն նախագիծ է, որի ամբողջական բովանդակությանը մենք ականատես կլինենք ապագայում և գնահատական կտանք»։ Նա նշեց, որ, համենայն դեպս, առաջին քայլը դրական են գնահատում։ Նրա խոսքով՝ բիզնեսն այն է, երբ մրցակցություն, որոշակի ռիսկայնություն է առկա, իսկ նշվածը բիզնես չէր. «Գիծ քաշել և կարգավորել երթևեկությունը, կանայելը»:
