«Մենք այս խստությամբ վախեցնում ենք կեղծիք հայտնաբերողին». Արամ Մանուկյան
ԱԺ ՀԱԿ խմբակցության պատգամավոր Արամ Մանուկյանն Ընտրական օրենսգրքում փոփոխություններ անելու մասին նախագծի քննարկման ժամանակ հետաքրքրվեց Կառավարության աշխատակազմի ղեկավար-նախարար Դավիթ Հարությունյանից, թե ինչո՞ւ են տեքստում շատ այնպիսի էպիտետները, ինչպիսիք են՝ աներկբա, բացառապես, և այլն, նաև հարց բարձրացրեց ուրիշի փոխարեն ստորագրելու ու դրա մասին սուտ հայտարարություն անելու դեպքերի համար սահմանված պատժի մասին.
«Ուրիշի փոխարեն ստորագրելու կամ հայտարարելու համար սահմանված է 2-5 տարի ազատազրկում. իհարկե մեր ստորագրածն է, բայց իրավիճակ ասեմ, որի դեպքում կարող ենք անհեթեթ իրավիճակի մեջ հայտնվել. Վստահված անձը հայտարարություն է անում, որ 10 հոգի չեն եկել քվեարկության, բայց իրենց տեղը քվեարկել են. 9-ում ճիշտ է դուրս գալիս, որ ուրիշի տեղն են քվեարկել, 10-րդում սխալվում է, թյուրիմացություն է եղել։ Այս դեպքում սուտ հայտարարության մեջ նրան կարող ենք մեղադրել և 2-5 տարի հոդված տալ։ Ստացվում է՝ մարդը փորձում է կեղծիքների դեմ պայքարել, փաստեր է ներկայացնում, բայց 1/10 մասով թյուրիմացություն է լինում։ Մենք այս խստությամբ վախեցնում ենք կեղծիք հայտնաբերողին»։
Այս հարցադրմանը Դավիթ Հարությունյանն այսպես պատասխանեց. «Ձեր ասած՝ էպիտետների օգտագործումը եկել է իրական կյանքից։ Որոշ դեպքերում անհրաժեշտ են գնահատողական դատողություններ, որովհետև խոսքը վերաբերում է դիմումին, դիմումի պարագայում առկա են ապացույցներ, և սեղմ ժամկետը ոչ միշտ է հնարավորություն տալու գտնել օբյեկտիվ ճշմարտությունը։ Գնահատողական դատողությունների տեսանկյունից շատ կարևոր է, որ ձևակերպումները լինեն հստակ։
Ինչ վերաբերում է նրան, որ, եթե 100 հատը ճիշտ է, մեկը՝ սխալ, նման դեպքերում դատարանին, իրավապահ մարմիններին տրված են բազմաթիվ գործիքներ ավելի մեղմ պատիժ կիրառելու կամ քրեական հետապնդումը դադարեցնելու»։
