Առանց անվտանգության
«ՀՀ-ԵՄ համաձայնագրի ստորագրումը միշտ էլ վտանգի տակ է եղել, բայց ոչ այն պատճառով, որ անվտանգության ուղղությամբ նոր միտումներ են ի հայտ եկել։ Դրա պատճառներն այլ են։ Չեմ կարծում, որ ԵՄ-ՀՀ հարաբերություններին վերաբերող այսօրվա բանակցություններն այնքան խորն ինտեգրացիա են ենթադրում, որ այնտեղ որպես բաղադրիչ՝ լինի անվտանգության խնդիր։ Այնպես որ, այս անվտանգության խնդիրների քննարկումները ներկայիս բանակցությունների օրակարգի հետ որևէ առնչություն չունի»,- 168.am-ի հետ զրույցում այս մասին է ասել Երևանի մամուլի ակումբի նախագահ Բորիս Նավասարդյանը՝ անդրադառնալով հարցին, թե ԵՄ-ում ու ԱլԳ-ի շուրջ անվտանգության բաղադրիչի ամրապնդման խոսակցություններն ինչպե՞ս կանդրադառնան ՀՀ-ԵՄ համաձայնագրի հարցում Մոսկվայի դիրքորոշման վրա։
Նավասարդյանը նաև նշել է, որ Ռուսաստանը պաշտոնական մակարդակով հիմնականում քննադատաբար է վերաբերվելու եվրոպական զինված ուժերի ձևավորման հարցին և անընդհատ քարկոծելու է այդ գաղափարը։ «Բայց դա չի նշանակում, որ այս միտումներն իրականում հակասում են ՌԴ շահերին, որովհետև ՌԴ արտաքին քաղաքականության ուղղվածությունը, իր առջև՝ որպես առաջնային խնդիր, ունի նաև՝ հնարավորինս ջլատել Արևմուտքը և խոչընդոտել արևմտյան երկրների միասնությանը։ Եթե խորանան հակասություններն այս հարցում, դա միայն Ռուսաստանին ձեռնտու կլինի»,- պնդել է Երևանի մամուլի ակումբի նախագահը։
Հարցազրույցն ամբողջությամբ կարող եք կարդալ «168 Ժամ» թերթի վաղվա համարում:
