Ֆրանսիայի և Ադրբեջանի արտգործնախարարները քննարկել են Ղարաբաղի հարցով Վիեննայի հանդիպման արդյունքները
Աշխատանքային այցով Ֆրանսիայում գտնվող Ադրբեջանի արտգործնախարար Էլմար Մամեդյարովը հանդիպել է Ֆրանսիայի արգործնախարար Ժան-Մարկ Էյրոյի հետ, հայտնում է APA գործակալությունը՝ հղում կատարելով Ադրբեջանի արտգործնախարարության մամուլի ծառայությանը:
Զրույցի ընթացքում կողմերը կարծիքներ են փոխանակել մայիսի 16-ին Վիեննայում Լեռնային Ղարաբաղի հարցով հրավիրված հանդիպման արդյունքների վերաբերյալ:
Երկու երկրների նախարարները հաստատել են կողմերի կողմից հրադադարի ռեժիմի պահպանման պայմանավորվածությունների կատարումը, ինչպես նաև վերահաստատել են լիարժեք բանակցային գործընթացի վերսկսման անհրաժեշտությունը, որի նպատակն է Լեռնային Ղարաբաղի հակամարտության համակարփակ կարգավորմանը հասնելը:
Մամեդյարովը ողջունել է ֆրանսիական կողմի պատրաստակամությունը՝ գործադրել ջանքերը կարճ ժամանակում կազմակերպել հաջորդ հանդիպումը, որի մասին սկզբունքային համաձայնություն էին ձեռք բերել կողմերը Վիեննայում:
Վերջիններս քննարկել են նաև ադրբեջանա-ֆրանսիական հարաբերություններին վերաբերող օրակարգային հարցեր:
