Վրաստանի վարչապետն արտակարգ խորհրդակցություն է անցկացրել ԼՂ իրավիճակի վերաբերյալ
Վրաստանի վարչապետ Գեորգի Կվիրիկաշվիլին հատուկ խորհրդակցություն է անցկացրել երկրի ուժային կառույցների ներկայացուցիչների հետ՝ կապված Լեռնային Ղարաբաղում իրավիճակի սրացման հետ ու հույս է հայտնել, թե էսկալացիան միջազգային հանրության ջանքերով կթուլանա:
«Կապված Լեռնային Ղարաբաղում ստեղծված իրավիճակի հետ՝ վարչապետը հատուկ հանդիպում է անցկացրել արտգործնախարարի, ուժային նախարարների, համապատասխան կառույցների ու խորհրդարանական կոմիտեի նախագահի հետ: Վարչապետը լսել է ուժային կառույցների ներկայացուցիչների ողջ տեղեկատվությունը, որը վերաբերել է Լեռնային Ղարաբաղին»,- հայտնել են Վրաստանի կառավարության մամուլի ծառայությունից:
Նշվում է, որ Կվիրիկաշվիլին իր «անհանգստությունն է հայտնել՝ կապված էսկալացիայի ու ռազմական գործողությունների վերսկսման հետ, որը հանգեցրել է զոհերի, այդ թվում՝ խաղաղ բնակչության շրջանում ու հույս է հայտնել, թե միջազգային հանրության ջանքերով տեղի կունենա իրավիճակի ապասրացում»:
