Որոնման ցանկալի արդյունք՝ հարկային արտոնության դիմա՞ց. Google-ը հերքում է մեղադրանքները

Որոնումների  «հսկան» մեղադրվում է Տորիի (Մեծ Բրիտանիայի պահպանողական կուսակցություն) նպաստավոր հարկային գործարքի դիմաց որոնումների բացասական արդյունքները վերացնելու  մեջ: Այս մասին հայտնում է Independent-ը:

Google-ը հերքում է  որոնումների արդյունքների նենգափոխման վարկածը և, ի ուրախություն պահպանողականների, հայտարարում, որ  հավատարիմ է մնալու 130 մլն ֆունտ արժողությամբ հարկային համաձայնագրին:

Խնդիրը կապված է Google-ի՝ փնտրման պատուհանում արտահայտությունն ավտոմատ լրացնելու, շարունակություն առաջարկելու ֆունկցիայի հետ:

Այսպես, որոնման համակարգում «Labour are…» (Աշխատավորական կուսակցությունը… է) գրելու դեպքում՝ Google-ն առաջարկում է այսպիսի շարունակություն՝  «finished» (վերջացած է) կամ «joke» (կատակ)։ «Լիբերալ Դեմոկրատները»-ի դեպքում՝ Google-ի առաջարկներն ավելի դաժան են՝ «traitors» (դավաճաններ) և «pointless» (աննպատակ):

Սակայն Պահպանողական կուսակցության դեպքում Google-ի ավտոլրացման ֆունկցիան անջատված կլինի՝ այն տարբերակներ չի առաջարկում։

Սա անուղղակիորեն հաստատում է այն մեղադրանքները, որ տարբերակների բացակայությունը ՄԹ կառավարության կողմից Google-ին առաջարկված նպաստավոր հարկային գործարքի արդյունքն է։

Ինչպես բազմիցս հայտարարվել է, Google-ը վերջերս ստացել է 130 մլն ֆունտի  հարկային հաշիվ, չնայած վերջին տասնամյակում այս ընկերությունը 7,2 մլրդ ֆունտ շահույթ է ունեցել Մեծ Բրիտանիայում:

Ըստ  Guardian-ի՝  Google-ը պատասխանել է մեղադրանքներին` ասելով, որ ընկերությունը  «կարող է միանշանակ հաստատել, որ հարկային գործարքը կապ չունի որոնման համակարգի հետ, իսկ  «դավադրությունների տեսությունները» ոչ մի կերպ հիմնավորված չեն»:

«Ինքնալրացման առաջարկներն արվում են մի շարք գործոնների ազդեցությամբ, ինչպես, օրինակ, որոնվող տերմինների  հանրաճանաչությունը»,- հայտնում է ընկերությունը:

Նշենք, որ Google-ի սեփականատեր ընկերությունը` Alphabet-ը,վերջերս գերազանցել է  Apple-ին՝ որպես աշխարհի ամենաթանկ ընկերություն:

Ըստ Independent-ի՝

նյութը հրապարակման պատրաստեց Կարինե Սիմոնյանը