«Կարևոր չէ՝ ով կնշանակվի ՄԻՊ պաշտոնում»
ԳԽ նախկին պատգամավոր Ազատ Արշակյանի կարծիքով՝ վաղուց ժամանակն է Հայաստանում վերացնել ՄԻՊ կառույցը: Այսօրվա ասուլիսին նա նշեց, որ մեր երկրւոմ չպետք է լինի մարդու իրավունքնեևի պաշտպանի պաշտոն. «Ըստ Սահմանադրության՝ ՀՀ նախագահը հենց մարդու իրավունքների պաշտպանն է, դրա համար նա ունի նաև լծակներ՝ իրավապահ մարմիններ, պաշտոնյաներ, ովքեր պետք է կանխեն մարդու իրավունքների խախտումը մեր երկրում: Իսկ քանի որ Սովետական միությունից հետո Հայաստանը պետք է անցումային շրջան ունենար, մարդու իրավունքների դաղափարը հասանելի դարձնելու, քարոզչական նկատառումներով արժեր ունենալ նման պաշտոն»:
Նրա կարծիքով՝ ՀՀ-ում մարդու իրավունքների երկրորդ պաշտպանը խոսքի ազատությունն է և հասարակական կազմակերպությունները. «Այն, ինչ նախագահը չի նկատել, պետք է նկատեին հասարակական կազմակերպությունները։ Իսկ հիմա այն միջոցները, որ հատկացվելու են մարդու իրավունքների պաշտպանի բյուրոկրատական համակարգին հարկավոր է գրանտի տեսքով բաժանել ՀԿ-ներին, որպեսզի մենք չասենք՝ օտար երկրից կամ անհայտ պատվիրատուներից են սնվում մարդու իրավունքներին հետևող կազմակերպությունները կամ մտավորականները, այդ կազմակերպությունները պետք է հաշվետու լինեն մեր պետությանն ու հասարակությանը: Արդարադատության նախարարությանը պետք է հաշվետվություն տան, թե ինչի վրա են ծախսում իրենց հատկացված գումարները»:
Հ. Թումանյանի անվան տիկնիկային թատրոնի ղեկավար Ռուբեն Բաբայանը նույն կարծիքին է. «Պարոն Արշակյանի ասածը շատ տրամաբանական է, և եթե երկրում հավասարություն լիներ, այդ ինստիտուտի կարիքը չէր լինի։ ժողովրդավարության տեսակետից այսօր գտնվում ենք շատ ավելի բարենպաստ պայմաններում, քան 90-ական թվականներին»։
Նա ընդգծեց՝ Հայստանը դեռ մարդակենտրոն երկիր չէ, ու քանի այդպես չէ, պետք է մտածել` ինչ տիպի մարդու իրավունքների պաշտպան է պետք. « Ինձ մոտ այնպիսի տպավորություն է, որ վերին ատյաններն ուզում են ունենալ Ադրբեջանի մարդու իրավունքների պաշտպանի նման մի պաշտպան: Ուզում են ունենալ մի անձնավորություն, որը հասարակության մեջ ու միջազգային ասպարեզում հեղինակություն կվայելի և միաժամանակ որևէ բանով երբևէ չի ընդվզի այն բոլոր խախտումների դեմ, որոնք տեղի են ունենում: Նման բան չի լինում: Ամենակարևորը ճիշտ կողմնորոշումն է»:
Ազատ Արշակյանի կարծիքով՝ կարևոր չէ՝ ով կնշանակվի ՄԻՊ պաշտոնում. «Կեղծ օրակարգ է: Ամեն ինչ անտաղանդ ու գռեհիկ է արվում»:
Ռ. Բաբայանն էլ ասաց՝ եթե արմատական փոփոխություն են ուզում, ապա Սովետական միության նախկին քաղբանտարկյալների մեծ մասը կարող է ՄԻՊ պաշտոնը զբաղեցնել. «Քաղբանտարկյալները արժանի են հատուկ վերաբերմունքի և հարգանքի, որովհետև դուրս գալ մի ամբողջ կայսրության դեմ ու դուրս գալ մի կուսակցության դեմ, տարբեր բաներ են: Կան նաև բազմաթիվ ՀԿ-ների ղեկավարներ, որոնք այս տարիներին ապացուցել են, որ իրենք ուշադիր են բոլոր հարցերի հանդեպ»:
