Թբիլիսիում իր աշխատանքն է սկսել «Մետաքսի ճանապարհ» ֆորումը
Հոկտեմբերի 15-16-ը Թբիլիսիում առաջին անգամ անցկացվում է «Մետաքսի ճանապարհ» ֆորումը, որը հրավիրվել է Վրաստանի վարչապետ Իրակլի Ղարիբաշվիլիի նախաձեռնությամբ, հայտնում է apsny.ge-ն:
Վրաստանի էկոնոմիկայի ու կայուն զարգացման նախարարության տեղեկություններով՝ միջազգային խոշոր միջոցառման կազմակերպիչը Վրաստանի կառավարությունն է, համակազմակերպիչը՝ Չինաստանը, գործընկերը՝ Զարգացման ասիական բանկը (ADB):
Վրացական կողմից ֆորումի կազմակերպիչն է Վրաստանի էկոնոմիկայի ու կայուն զարգացման նախարարությունն ու ԱԳՆ-ն:
Թբիլիսյան ֆորումին մասնակցում է շուրջ 30 երկրի կառավարության ներկայացուցիչ (Հայաստան, Ադրբեջան, Չինաստան, ԱՄԷ, Թուրքիա, ԱՄՆ, Հարավային Կորեա, Աֆղանստան, Սլովենիա, Հունգարիա, Իտալիա, Չեխիա, Ղազախստան), այդ թվում՝ փոխվարչապետեր, նախարարներ, ինչպես նաև 20 միջազգային, ֆինանսական ու դոնորական կազմակերպություններ:
Միջոցառմանը մասնակցում են նաև բիզնես-ոլորտի ներկայացուցիչներ տարբեր պետություններից:
