Ինչպե՞ս խուսափել սննդային թունավորումներից. խորհուրդներ գաստրոէնտերոլոգից
Գաստրոէնտերոլոգ-թերապևտ Աննա Մարտիրոսյանն այսօր լրագրողների հետ հանդիպման ընթացքում ասաց, որ թունավորումներից խուսափելու համար նախ պետք է հասկանալ ինչ ենք գնում և ինչ պատրաստում. «Գնվող մթերքի ժամկետը պետք է անպայման ստուգել, կաթնամթերքը պետք է հնարավորինս թարմ լինի: Մի գնեք սառնարանում չվաճառվող յոգուրտներ, ուշադիր եղեք նաև բաց սառնարաններից դրանք գնելու ժամանակ: Դրսում վաճառվող մսամթերք ընդհանրապես չգնել, քանի որ սառնարանից դուրս գտնվելով՝ մի քանի ժամում այն փչանում է: Երեխաներին ցանկալի է չառաջարկել մսամթերք և կիսաֆաբրիկատներ»:
Գաստրոէնտերոլոգը զգուշացրեց՝ կարտոֆիլ և ձու պարունակող աղցանները մեկ օրվա ընթացքում կարող են սուր թունավորման պատճառ դառնալ, ուստի նախընտրելի է մեկ օրից ավել չպահել. «Հավկիթը ևս առաջացնում է թունավորում, ցանկալի է ուտել լավ խաշած տարբերակով, իսկ եփելուց առաջ հավկիթը լավ լվանալ, ցանկալի է նույնիսկ օճառաջրով: Այս շոգ եղանակին խուսափեք նաև ձկնամթերք օգտագործելուց, իսկ դրանց պահածոյացված տարբերակներից ընդհանրապես հրաժարվեք»:
Ըստ մասնագետի՝ ձմերուկի թունավորումների շատ դեպքեր են գանցվում, դրանցից խուսափելու համար խորհուրդ է տրվում օգտագործելուց առաջ կեղևը լավ լվանալ հոսող ջրի տակ, և կեղևից 3 սմ բարձր կտրել, քանի որ դրա մեջ պարունակվում են նիտրատներ: Ձմերուկի դիետաներ չպահել: Հաճախ ձմերուկը լինում է արհեստական աճեցված, ուստի հղի կանանց և երեխաներին խորհուրդ է տրվում շատ չօգտագործել»:
Մասնագետը խորհուրդ տվեց օգտագործել հոսող ջրի տակ լավ լվացած մրգեր, բանջարեղեն, տավարի և հավի թարմ միս: Չջրազրկվելու համար՝ ընդունել շատ հեղուկներ. «Քանի որ քրտնքի հետ կորցնում ենք ոչ միայն հեղուկ, այլև աղեր, ուստի խորհուրդ կտամ հանքային ջուր էլ օգտագործել»
