Սյունիքի 62-ամյա բնակիչը պնդում է, որ թեմի առաջնորդն իրեն «ծեծել է տվել». news.am
Սյունիքի մարզի Վերին Շեն համայնքի 62-ամյա բնակիչ Սերյոժա Միրումյանը պնդում է, որ մի խումբ երիտասարդներ իրեն ծեծի են ենթարկել Սյունյաց թեմի առաջնորդական տեղապահ տեր Մակար վարդապետ Հակոբյանի ցուցումով: NEWS.am-ի հետ զրույցում Սերյոժա Միրումյանը պատմեց, որ իր ու տեր հոր միջեւ վիճաբանություն է սկսվել եկեղեցու տարածքում չծխելու հարցի շուրջ:
«Իմ եւ հարեւանիս ոչխարները մտել են բակ, ծխախոտը ձեռքիս գնացի եկեղեցի ոչխարներին դուրս բերելու՝ հանդիպեցի տեր հորը: Ասում ա՝ պապիրոսդ դեն գցի, ասեցի՝ դու ով ես, որ ինձ ասես պապիրուսդ դեն գցի: Ես էլ չէի ճանաչում իրեն, չգիտեի, որ տեր-հայր ա: Ասում ա՝ հեսա գյուղապետին զանգեմ, ասում եմ՝ քեզ էլ, գյուղապետիդ էլ: Որ իմանայի՝ տեր հայր ա, սուս կանեի»,- պատմեց Սերյոժա Միրումյանը ՝ նշելով, որ տեր հայրը քաղաքացիական հագուստով է եղել:
Սերյոժա Միրումյանի խոսքով՝ իրենք վիճել են, վիրավորական խոսքեր, հայհոյանքներ ասել միմյանց հասցեին, ինչից հետո տեր հայրը հեռացել է, որոշ ժամանակ անց վերադարձել երեք հոգու հետ, որոնք էլ ծեծել են իրեն: Տղամարդու խոսքով՝ կռվին միջամտել է որդին, հետո նաեւ համագյուղացիները:
«Տեսա՝ մի մաշինա մի 5-6 հոգի եկել էին, հարձակվեցին ու տուր թե կտաս»,- ասաց Սերյոժան:
Տեր Մակար վարդապետ Հակոբյանը ժխտում է, թե իր ցուցումով են ծեծել գյուղացուն: NEWS.am-ի հետ զրույցում նա ասաց, որ գյուղացիներն են ծեծել Սերյոժա Միրումյանին այն պատճառով, որ նա հայհոյել է տեր հորը:
«Ես որ գնացի, տեսա՝ եկեղեցում ոչխար են պահում: Երբ դուրս եկավ, ասեցի՝ ո՞ւմ ոչխարն ա, ասեց՝ իմ, ասեցի՝ չի կարելի եկեղեցում ոչխար պահել, մի հատ լավ հայհոյանք ստացա: Լսում եմ՝ կողքից մարդիկ ասում են՝ ինչի՞ ես հայհոյում, ասում ա՝ լավ եմ անում, ու գլուխը տնկած գնում ա: Հասել եմ էն պահին, որ մի քանի ջահել տղերք հարվածել են իրեն, հասել եմ, բաժանել եմ»:-ասաց նա:
Մանրամասներն՝ սկզբնաղբյուր կայքում:
