Մինսկը պատրաստ է աջակցել ԵՏՄ-ի ու ԵՄ-ի մերձեցմանը. Բելառուսի ԱԳՆ
Ռուսական РИА Новости լրատվական գործակալության փոխանցմամբ` Բելառուսը պատրաստ է աջակցել ԵՏՄ-ի ու ԵՄ-ի մերձեցմանը: Այս մասին Մինսկում հայտարարել է Բելառուսի առաջին փոխարտգործնախարար Ալեքսանդր Միխնևիչը.
«Մենք գիտակցաբար ու պատասխանատվությամբ ենք դիտարկում ոչ վաղ անցյալում ստեղծված ԵՏՄ-ի ու ԵՄ-ի մերձեցման հեռանկարները և պատրաստ ենք առավելագույն ներդրում ունենալ այդ գործընթացում:
Բելառուսը մշտապես ձգտել է փոխշահավետ համագործակցություն հաստատել թե´ Արևելքի, թե´ Արևմուտքի հետ և ոչ թե ընտրություն կատարել այդ կենտրոնների միջև: Այդպիսի դիրքորոշումը հավելյալ արժեք է ներկայացնում թե´ Ռուսաստանի, թե´ ԵՄ-ի համար:
Ռուսաստանի հետ դաշնակցային հարաբերություններ հաստատելով` Բելառուսը որևէ կերպ դա չի անում Արևմուտքի հետ համագործակցությունը վնասելու գնով:
Ընդհակառակը` ԵՄ-ի հետ առևտրային-տնտեսական գործընկերային կապերի զարգացումը որևէ կերպ չի անդրադառնում Ռուսաստանի հետ մեր սերտ փոխգործակցության դինամիկայի վրա»:
