ԵՄ-ը կշարունակի աջակցել ԵԱՀԿ Մինսկի խմբի գործունեությանը
Ադրբեջանական Trend լրատվական գործակալության փոխանցմամբ՝ ԵՄ-ը Ղարաբաղյան հակամարտության կողմերին կոչ է արել զերծ մնալ այնպիսի գործողություններից ու հայտարարություններից, որոնք կնպաստեն լարվածության աճին ու կխաթարեն խաղաղության գործընթացը:
Այս մասին նշված է Եվրոպական հարևանության քաղաքականության շրջանակներում Ադրբեջանի առաջընթացի մասին ԵՄ-ի տարեկան զեկույցում: Դրանում ընդգծվում է, որ նախորդ տարի լրացել է հրադադարի ստորագրման 20-ամյակը և չնայած դրան՝ Ղարաբաղյան հակամարտության կարգավորման հարցում պահպանվում է փակուղային իրավիճակ.
«Տեղում անվտանգության շուրջ իրավիճակը շարունակում է խնդիր մնալ միջադեպերի ու զոհերի ֆոնին, որոնց թիվը հասել է 1994 թվականից սկսած՝ աննախադեպ բարձր մակարդակի»: ԵՄ-ը նաև ընդգծել է, որ հավատարիմ է մնում ԵԱՀԿ Մինսկի խմբի գործունեությանն աջակցելուն:
