Ուկրաինան ապրիլի 1-ից կդադարեցնի ռուսական գազ գնելը
Ուկրաինական UNIAN լրատվական գործակալության փոխանցմամբ՝ Ուկրաինան ապրիլի 1-ից կդադարի գնել ռուսական գազ, քանի որ չի լինի դրա անհրաժեշտությունը: Այս մասին լրագրողների հետ ճեպազրույցում հայտարարել է Ուկրաինայի էներգետիկայի ու ածխային արդյունաբերության նախարար Վլադիմիր Դեմչիշինը. «Ներկայումս չկա ռուսական գազ գնելու անհրաժեշտություն: Կարծում եմ, որ մենք չենք գնի այն»:
Մարտի 20-ին Բրյուսելում անցկացվել է էներգետիկ բանակցությունների հերթական փուլը, որում քննարկվել են Ուկրաինայի համար ռուսական գազի գներն այսպես կոչված «ամառային փաթեթի» շրջանակներում՝ սկսած 2015 թվականի ապրիլի 1-ից: Բանակցություններն անցել են Ուկրաինա-ԵՄ-Ռուսաստան ձևաչափով՝ էներգետիկայի նախարարների ու էներգետիկ հարցերով եվրահանձնակատարի մասնակցությամբ:
Կողմերը համաձայնվել են, որ ամբողջովին իրագործվում են 2014 թվականի հոկտեմբերի 30-ին ձեռք բերված «ձմեռային փաթեթի» պայմանները, սակայն «ամառային փաթեթի» պայմանները պետք է քննարկվեն փորձագիտական խմբերի կողմից:
