Վրաստանի ԱԳՆ-ն արձագանքել է ռուս-օսական պայմանագրի ստորագրմանը
Новости-Грузия լրատվական գործակալության փոխանցմամբ՝ Վրաստանի ԱԳՆ-ն արձագանքել է Ռուսաստանի ու Հարավային Օսիայի միջև երեկ դաշնակցության ու ինտեգրման մասին համաձայնագրի ստորագրմանը: Վրաստանի ԱԳՆ-ը դա որակել է որպես Ռուսաստանի կողմից երկրի հանդեպ ագրեսիայի շարունակում:
Վրաստանի ԱԳՆ-ը հիշեցրել է, որ Ռուսաստանը սրանից առաջ էլ նման համաձայնագիր է ստորագրել Աբխազիայի հետ, և որ Ռուսաստանի այդօրինակ գործողությունները հանդիսանում են միջազգային իրավունքի խախտում՝ կապված պետությունների սահմանների անխախտության ու տարածքային ամբողջականության պահպանման հետ:
Վրաստանի ԱԳՆ-ն ընդգծել է, որ երեկ ստորագրված պայմանագիրը, Աբխազիայի հետ ստորագրված պայամանագրի նման, ուղղված է Վրաստանի ինքնիշխանության ու տարածքային ամբողջականության դեմ, և որ այդ պայմանագիրը նշանակում է Ցխինվալի շրջանի փաստացի բռնակցում:
Վրաստանի ԱԳՆ-ը միջազգային հանրությանը կոչ է արել իրավական ու քաղաքական անհրաժեշտ գնահատական տալ Ռուսաստանի ապօրինի գործողություններին և ձեռնարկել գործուն քայլեր, այդ թվում նաև անվտանգության միջազգային մեխանիզմներ ստեղծելով:
