Հայրենիքում կվերապատրաստվի 250 սփյուռքահայ ուսուցիչ
ՀՀ կառավարությունը հավանություն է տվել «Սփյուռքի ամառային դպրոց» 2015թ. ծրագրին, որի համաձայն ս.թ. վեց դասընթացներում կվերապատրաստվի մինչև 250 սփյուռքահայ ուսուցիչ: Հավանություն է ստացել սփյուռքի երիտասարդների հայրենաճանաչության «Արի տուն» 2015թ. ծրագիրը, ըստ որի ակնկալվում է մինչև 1100 սփյուռքահայ երիտասարդի այցելություն Հայաստան:
ՀՀ կառավարությունը հաստատել է՝
-ԱՊՀ մասնակից պետությունների հակաահաբեկչական կենտրոնում ՀՀ ներկայացուցչի գործունեության կանոնակարգը,
-ՀՀ տարածք ներմուծվող առանձին ապրանքների նպատակային նշանակությունը հաստատող ՀՀ լիազոր պետական կառավարման մարմինների ցանկն ըստ ոլորտների, որը թելադրված է ԵՏՄ իրավական ակտերից բխող համաձայնագրերի և դրանցից բխող որոշումների կիրառման պարտավորությամբ:
Նիստում հավանության է արժանացել «Հայաստանի Հանրապետության և Բելառուսի Հանրապետության միջև Բելառուսի Հանրապետությունում ԱՊՀ կանոնադրական և այլ մարմիններում ՀՀ ներկայացուցչության հիմնման, արտոնությունների և իմունիտետի մասին» համաձայնագիրը:
Գործադիրը հավանություն է տվել Հայաստանի Հանրապետության և Լեհաստանի Հանրապետության կառավարությունների միչև քաղաքացիական ավիացիայի տրանսպորտի մասին 1998թ. հունվարի 27-ին կնքված համաձայնագրում փոփոխություններ և լրացումներ կատարելու արձանագրության կնքման առաջարկությանը: Փաստաթղթի վերանայումը պայմանավորված է Հայաստանի ավիացիայի ոլորտի նոր՝ «Բաց երկնքի» քաղաքականության իրականացման և երկու երկրների ավիացիոն հարաբերությունների պատշաճ կարգավորման անհրաժեշտությամբ:
