Տիգրան Կարապետյան. Ոչ իշխանական ուժերի լիդերը Գագիկ Ծառուկյանն է
Ինչպես հայտնի է, նոյեմբերի 17-ին Ժողովրդական կուսակցության նախագահ Տիգրան Կարապետյանը հայտարարել էր, որ իր գլխավորած կուսակցությունը միանում է ոչ իշխանական երեք ուժերին` ԲՀԿ-ին, ՀԱԿ-ին և «Ժառանգությանը»: Դրանից հետո տեղի էր ունեցել ԲՀԿ նախագահ Գագիկ Ծառուկյանի և Տիգրան Կարապետյանի հանդիպումը: Այսօր տեղի ունեցած մամուլի ասուլիսում այս մասին մեկ անգամ ևս հաստատեց կուսակցության առաջնորդը:
Տիգրան Կարապետյանի խոսքով` եռյակն իսկապես դառնում է համաժողովրդական շարժում, քանի որ տասնյակ կուսակցություններ են միավորվում. «Այսօր այնպիսի իրավիճակ է ստեղծվել, որ երբեք չի եղել Հայաստանում: Ամբողջ դաշտը փորձում է միանալ, մեկ միավոր դառնալ: Սա շատ լավ է, մինչև տարեվերջ նաև հանրահավաքներ ենք անելու, որից մեկը կլինի մշտապես, այսինքն` ամեն օր երթեր ու հանրահավաքներ կլինեն: Դեկտեմբերի 10-ին ես ևս լինելու եմ հանրահավաքին»:
Ըստ Տ. Կարապետյանի` շարժումը կարողացել է համախմբել տարբեր կարծիքներ մեկ խնդրի շուրջ, մնում է միայն, որ լիդերները` կուսակցությունների ղեկավարները, իրենց ամբիցիաները մի կողմ դնեն և մտածեն ինչպես իրականացնել ժողովրդի երազանքը. ձեռք բերել արդար իշխանություն և բարեկեցություն:
Տ. Կարապետյանն ասաց, որ շատ գոհ է, շատ ոգևորված, մանավանդ՝ ԲՀԿ առաջնորդ Գագիկ Ծառուկյանի հետ հանդիպումից հետո, ով ահագին հույսեր է ներշնչել իրեն: Մնում է ժողովուրդը պատրաստ լինի փոփոխությունների. «Եթե ժողովուրդը պատրաստ լիներ, հանրահավաքները շարունակական կլինեին: Ժողովուրդը մի հանրահավաքին գալիս է մեծ քանակով, մյուսին գալիս է ավելի պակաս: Չեմ կարծում, որ դրանում եռյակն է մեղավոր»:
Տ. Կարապետյանն անձամբ գտնում է, որ ոչ իշխանական ուժերի լիդերը Գագիկ Ծառուկյանն է, քանի որ նրա ռեսուրսը, նրա ներդրած լուման ժողովրդի համար շատ ավելի մեծ է. «Չնայած անձամբ ինքը` Գագիկ Ծառուկյանը, ասում է, որ բոլորս հավասար ենք, բայց դա չի նշանակում, որ ժողովուրդը համախմբված չէ նրա շուրջ: Ես գտնում եմ, որ դա է իրականությունը: Այսօր համաժողովրդական շարժումը, որը համախմբվել է եռյակի շուրջ, ռեալ ուժ է, և որևէ այլ մրցակից այդ ուժին ես չեմ տեսնում ո՜չ ներկայիս դրությամբ, ո՜չ էլ ապագայում»:
