«Զարուհի Փոստանջյանի ասածն արտաքին քաղաքական խնդիրներին է վերաբերում». Արմեն Մարտիրոսյանը խուսափում է մեկնաբանել Փոստանջյանի՝ քառյակին ուղղված քննադատությունը
«Խորհրդարանական 4 ուժերի համագործակցության օրակարգն իշխանությունների պես հետ է մնացել քաղաքական իրադարձություններից, ինչպես 88 թվականին Կոմունիստական կուսակցության «պարտ ղեկավարները»»,- ԳԱԼԱ-ին տված հարցազրույցում ասել էր ԱԺ «Ժառանգություն» խմբակցության պատգամավոր Զարուհի Փոստանջյանը, ով ներկայումս գտնվում է ԱՄՆ-ում։
Արդյոք «Ժառանգության» անդամները կիսո՞ւմ են Զ. Փոստանջյանի այս և քառյակի գործունեության վերաբերյալ մի շարք այլ գնահատականներ: Այս հարցերի շուրջ է 168.am-ի զրույցը «Ժառանգություն» կուսակցության վարչության փոխնախագահ Արմեն Մարտիրոսյանի հետ:
– Զարուհի Փոստանջյանը, կարծում եմ, ավելի մանրամասն կպատասխանի ձեր հարցերին, երբ այստեղ լինի: Ընդհանուր կոնտեքստից ես կտրված չեմ ուզում մեկնաբանել, որովհետև իր հարցազրույցում, ըստ էության, այդ ասածների հիմքում Եվրասիական միության հետ կապված խնդիրն է, շատ հասկանալի դա երևում է:
Իսկ քանի որ քառյակը Եվրասիական, ոչ միայն Եվրասիական, այլ ընդհանրապես արտաքին քաղաքական հարցերի հետ կապված քննարկումներ չի ունենում, չի ունեցել, և այդ առումով միանշանակ է, որ քառյակն ուղղակի չէր կարող որոշում կայացնել դրա հետ կապված, քանի որ ֆորմատը հենց բացառապես ներքաղաքական հարցերինէ վերաբերում:
– Սա նշանակում է, որ համամի՞տ եք այդ գնահատականի հետ:
– Համաձայն կամ ոչ համաձայն լինելու խնդիր այստեղ չկա: Նորից եմ կրկնում՝ Զարուհի Փոստանջյանի ասածն արտաքին քաղաքական խնդիրներին է վերաբերում, իսկ խորհրդարանական 4 ուժերը նմանատիպ օրակարգային հարց չունեն, որովհետև ի սկզբանե որոշվել է, որ արտաքին քաղաքական հարցերին չեն անդրադառնալու, որովհետև կուսակցությունները տարբեր մոտեցումներ ունեն արտաքին քաղաքական հարցերի շուրջ: «Ժառանգության» պահով, կարծում եմ՝ շատ հստակ է: Մենք Եվրասիական միության հետ կապված ևս մեկ հայտարարություն արեցինք մի քանի օր առաջ, ուստիև դիրքորոշման, այսպես ասեմ, խնդիր գոյություն չունի:
– Իսկ ինչպե՞ս եք վերաբերվում Զ.Փոստանջյանի մյուս գնահատականին, որ քառյակի երեք կուսակցությունները շարունակում են գործել օլիգարխիկ համակարգի տրամաբանության ներքո և սպասարկում են այդ համակարգը։
– Ես կարծում եմ՝ այն իրավիճակը, որ ստեղծվել է խորհրդարանում, համագործակցության առումով իսկապես եզակի է, ողջունելի է, որ խորհրդարանում 4 քաղաքական ուժեր կարողանում են համագործակցել իրար հետ որոշ հարցերի շուրջ: Հույս ունեմ, որ այդ համագործակցությունը կբերի իսկապես որակյալ նոր փոփոխությունների, և ցանկացած պարագայում մենք միասնական օրակարգը կկարողանանք բերել այն իրավիճակին, որ երկրում իսկապես արմատական փոփոխություններ լինեն: Համամիտ լինելու խնդիր չկա Զարուհի Փոստանջյանը երբ գա այստեղ, ամբողջովին կմեկնաբանի, թե ինքը ինչ է նկատի ունեցել:
– Այժմ Ձեր մեկնաբանությունն է հետաքրքիր:
– Իմ մեկնաբանությունը հետևյալն է՝ խորհրդարանում ձևավորվել է 4 ուժերի համագործակցություն, այդ հարցազրույցում էլ կա, Զարուհի Փոստանջյանը, ընդհանրապես մեկ նախադասությամբ եթե մեկնաբանենք, կարծես թե կտրվում է միտքը, բայց ինքՆ այնտեղ խոսում է, որ շատ ավելի լավ կլիներ, որ կուսակցական ձևաչափ դառնար դա, և այդ կուսակցական ձևաչափով կոնկրետ իշխանափոխության խնդիր լուծել: Ուստիև, նորից եմ ուզում կրկնել՝ համաձայնելու կամ չհամաձայնելու խնդիր չկա:
Մենք շատ դրական ենք վերաբերվում խորհրդարանի այդ համագործակցությանը: Լիահույս ենք կամ աշխատում ենք այն ուղղությամբ, որ դա դառնա միջկուսակցական և բերի իսկապես երկրում արմատական փոփոխությունների: Եվ քանի որ 4 խորհրդարանական ուժեր են մասնակցում, պարզ է, որ ամեն մեկն իր օրակարգն ունի և ամբողջ ցանկությունները չի, որ կարողանում ենք արտացոլել այդտեղ: Կոմպրոմիսների գալու անհրաժեշտություն է առաջանում, ուստի այդ կոմպրոմիսների արդյունքում հայտարարված քայլերը հրապարակվում են:
Ես շատ լավ կարդացել եմ՝ Զարուհին այստեղ սպասումների մասին է ասել. որ այդ սպասումներն ինքն ունի, հասարակությունը շատ ավելի արմատական սպասումներ ունի: Դրա մասին է խոսում Զարուհի Փոստանջյանը: Ես բառացի էությամբ չեմ զբաղվում. ես ընդհանուր միտքն եմ տեսնում, և ես միտքը մեկնաբանում եմ՝ իր ասածը դա է:
– Այսինքն՝ Դուք շարունակելու եք մասնակցել քառյակի ձևաչափով համագործակցությանը:
– Խորհրդարանում ստեղծվել է նորմալ աշխատանքային մթնոլորտ, և այդ աշխատանքները շարունակվում են: Դուք տեղյակ եք, որ մի քանի օր առաջ ավարտված նիստում որոշում է կայացվել 12 կետերի վերաբերյալ, մոտակա ժամանակներս դա կհրապարակվի, և այդ աշխատանքները շարունակվում են: Ինչ-որ արտակարգ իրավիճակ գոյություն չունի:
– Այդ դեպքում արդյո՞ք Զարուհի Փոտանջյանն է շեղվել կուսակցական գծից, թե՞«Ժառանգության» այն անդամները, ովքեր կողմ են քառյակի շրջանակներում համագործակցությանը:
– Որևէ մեկը որևէ գծից չի շեղվել: «Ժառանգությունը» գործում է իր ծրագրային դրույթներին համապատասխան, իր կանոնադրությանը համապատասխան: Ցանկացած կուսակցական կարող է նաև իր անձնական կարծիքը հայտնել:
Ես կարծում եմ՝ պարոն Հովհաննիսյանն ընդամենը մոտ մեկ ամիս առաջ ասուլիս տվեց, հստակ պատասխանեց այդ հարցերին, ուստիև որևէ մեկի շեղվելու խնդիր գոյություն չունի: Մենք երկար ժամանակ փորձում ենք միասնական պայքար ձեռնարկել, մեր ցանկությունն է արմատական իշխանափոխությունը, արտահերթ ընտրությունները և համակարգային բարեփոխումները, և այդ ուղղությամբ որքան հնարավոր քայլ լինում է՝ փորձում ենք օժանդակել: Այնպես որ, որևէ մեկի՝ կուսակցության գծից շեղվելու խնդիր չկա:
