Վաշտի հրամանատարը թողնելով ծառայության վայրը՝ 5 ամսով Մոսկվա է գնացել
Tesankyun.am-ը գրում է. Տավուշի մարզի Մովսես գյուղում հաշվառված, փաստացի Բերդ քաղաքում բնակվող, 1986թ. ծնված Ս. Ա.-ին մեղադրանք է առաջադրվել այն բանի համար, որ նա հանդիսանալով ՀՀ պաշտպանության նախարարության զորամասերից մեկի հրաձգային գումարտակի վաշտի հրամանատար, կոչումով կապիտան, 2013թ. նոյեմբերի 7-ից չի ներկայացել ծառայության վայր:
Նա 2014թ. ապրիլի 4-ին ինքնակամ ներկայացել է «Զվարթնոց» օդանակայանի գծային բաժին, որտեղից էլ՝ տարվել պաշտպանության նախարարության ռազմական ոստիկանության օպերատիվ հետախոզության բաժին: Ս. Ա.-ին մեղադրանք է առաջադրվել ՀՀ քրեական օրենսգրքի 62 հոդվածով(«Դասալքություն»), հետո առաջադրված հոդվածը փոխվել է քրեական օրենսգրքի 61 հոդվածի 5-մասով(«Զորամասը կամ ծառայության վայրն ինքնակամ թողնելը,եթե ինքնակամ բացակայությունը տեւել է մեկ ամսից ավելի, բայց զինվորական ծառայությունից խուսափելու նպատակով»): Ըստ «Դատալեքս» կայքի՝ նրա նկատմամբ խափանման միջոց է ընտրվել գրավը:
Ըստ տեղեկությունների՝ կապիտանը գնացել է Մոսկվա, պլանավորել է շուտ վերադառնալ, սակայն գործերն այնտեղ անհաջող են դասավորվել, չի կարողացել վերադառնալ:
Ս. Ա.-ն միջնորդել է անցկացնել արագացված դատաքննություն: Մայիսի 22-ին Տավուշի մարզի առաջին ատյանի դատարանի դատավոր Զոյա Զաքինյանը վճռել է ամբաստանյալին մեղավոր ճանաչել ՀՀ քրեական օրենսգրքի 61 հոդվածի 5-րդ մասով եւ նրան դատապարտել մեկ տարվա ազատազրկման: Դատավորը վճռել է կիրառել ՀՀ քրեական օրենսգրքի 70 հոդվածը, պատիժը պայմանականորեն չկիրառել,սահմանելով 1 տարվա փորձաշրջան:
