ԵՄ-ն Ուկրաինայի իշխանություններին կոչ է արել զերծ մնալ ուժ կիրառելուց
Ուկրաինական UNIAN լրատվական գործակալության փոխանցմամբ՝ ԵՄ-ը կոչ է արել պահպանել ժնևյան պայմանավորվածությունները: Այս մասին Բրյուսելում հայատարարել է ԵՄ-ի դիվանագիտության ղեկավար Քեթրին Էշթոնի մամլո քարտուղար Մայքլ Մաննը:
Նրա խոսքերով՝ ԵՄ-ն ուշադրություն է հրավիրել Ուկրաինայի արևելքում հակաահաբեկչական գործողության ակտիվ փուլի վերսկսման մասին Ուկրաինայի նախագահի պաշտոնակատար Ալեքսանդր Տուրիչինովի հայարարության վրա:
Մաննը հավելել է, որ իրենք ժնևյան պայմանավորվածությունները ստորագրած բոլոր կողմերին և հատկապես Ռուսաստանին կոչ են անում օգտագործել ազդեցության լծակները և անհապաղ կանգնեցնել այն, ինչը տեղի է ունենում Ուկրաինայի արևելքում:
Մաննը նկատել է, որ Ուկրաինայի անվտանգության ուժերը կարգուկանոն հաստատելիս պետք է հավատարիմ գտնվեն ժնևյան պայմանավորվածությունների ոգուն.
«Ուկրաինան օրինական իրավունք ունի գործելու ի պաշտպանություն տարածքային ամբողջականության ու ինքնիշխանության: Սակայն մենք իշխանությանը կոչ ենք անում զերծ մնալ ուժի կիրառումից՝ իրավիճակը տեղում էլ ավելի չվատթարացնելու համար»:
