«Հրաշագործ» Գեորգի Մարտիրոսյանը մոսկովյան դատարանում հերքել է իր հաճախորդներին սպանելու մասին մեղադրանքը
Ռուսական ИТАР-ТАСС լրատվական գործակալության փոխանցմամբ՝ «հրաշագործ» Գեորգի Մարտիրոսյանը Մոսկվայի քաղաքային դատարանում հերքել է իր երեք հաճախորդներին սպանելու ու թալանելու մասին մեղադրանքները: Նա հայտարարել է, որ մեղավոր չէ:
Մարտիրոսյանի փաստաբան Սուխանովի խոսքերով՝ նրա հաճախորդները թմրանյութ են օգտագործել և մահացել են դրա մեծ չափաբաժնի գործածման պատճառով:
Փաստաբանը հավելել է, որ մահացածները սերտորեն կապված են եղել Մարտիրոսյանի հետ, և ամբաստանյալը դրդապատճառներ չի ունեցել հանցանք գործելու համար. «Մահացածներ շատ բանով պարտական են եղել Մարտիրոսյանին, և եթե նա գումարի կարիք ունենար, ապա նրանք դա կտային նրան»:
Գործի նյութերի համաձայն, Մարտիրոսյանն իրազեկվել է իր հաճախորդների մոտ խոշոր գումարների առկայության մասին: Նա մոգական ծեսերի համար իր բնակարան եկած երեք կանանց (որոնցից մեկը՝ 38 տարեկան, իսկ մյուս երկուսը՝ 21 տարեկան) ըմպելիք է հյուրասիրել՝ նախապես նրանց բաժակներում գաղտնի հերոին լցնելով: Դրանից հետո նրանք հայտնվել են անօգնական վիճակում, և Մարտիրոսյանը թմրանյութի չափաբաժինը նրանց օրգանիզմում հասցրել է մահացու նշաձողի:
Հետաքննությունը կարծում է, որ դրանով իսկ Մարտիրոսյանը հափշտակել է ավելի քան 6.5 միլիոն ռուբլի, ինչպես նաև ոսկեղեն: Իր ծառայությունները նա գովազդել է համացանցում, ինչից հետո ոմանք խորհուրդներ ստանալու նպատակով դիմել են նրան: Առավել հանրաճանաչություն է վայելել հաճախորդի հարստացման ծիսակարգը: Դրա համար անհրաժեշտ է եղել զոհի մոտ առկա ողջ կանխիկ գումարը:
