Բաշար Ասադը Դամասկոսում ընդունել է Մոհամմադ Ջավադ Զարիֆին
Սիրիական SANA պետական լրատվական գործակալության փոխանցմամբ՝ Սիրիայի նախագահ Բաշար Ասադը Դամասկոսում ընդունել է Իրանի արտգործնախարար Մոհամմադ Ջավադ Զարիֆին:
Հանդիպման ժամանակ կողմերը քննարկել են ահաբեկչության դեմ պայքարը՝ ընդգծելով ծայրահեղականությունը սնող կրոնական անհանդուրժողականության գաղափարախոսության վտանգը:
Ասադի խոսքերով՝ վահաբականությունը սպառնում է ոչ միայն Սիրիային ու տարածաշրջանում նրա հարևաններին, այլև՝ համայն աշխարհին: Ասադը կոչ է արել միավորել ջանքերը ահաբեկչությանն ու ծայրահեղականությանը հակազդելու և դրանք արմատախիլ անելու հարցերում:
Զարիֆն իր հերթին հայտարարել է, որ Իրանն աջակցում է Սիրիայի ժողովրդին ու կառավարությանը: Զարիֆի խոսքերով՝ ճգնաժամի կարգավորումը գտնվում է իրենց՝ սիրիացիների ձեռքերում, և որ միայն նրանք կարող են որոշել իրենց երկրի ապագան:
